12 iyun 2026-cı il tarixdə Azərbaycan Respublikası Prezidentinin 2019-cu il 11 fevral tarixli 527 nömrəli Fərmanı ilə təsdiq edilmiş “Dövlət qulluqçusunun şəxsi işinin aparılması Qaydaları”na əsasən Dövlət İmtahan Mərkəzi tərəfindən hazırlanmış “Dövlət qulluqçusunun şəxsi işinin aparılması” informasiya sisteminin ali kateqoriya dövlət orqanlarının nümayəndələri üçün təqdimatı keçirilib. Təqdimatda Azərbaycan Respublikası Prezidentinin Administrasiyası, Azərbaycan Respublikasının Nazirlər Kabineti, Azərbaycan Respublikasının Konstitusiya Məhkəməsi, Azərbaycan Respublikasının Ali Məhkəməsi, Azərbaycan Respublikası Prezidentinin İşlər İdarəsi, Azərbaycan Respublikası Prezidentinin Protokol Xidməti və Azərbaycan Respublikasının Xüsusi Tibb Xidmətinin 20 nəfər nümayəndəsi iştirak edib.
Dövlət İmtahan Mərkəzinin İdarə Heyəti sədrinin müavini Bəhrəm Xəlilov tədbiri giriş sözü ilə açaraq iştirakçıları salamlayıb və “Dövlət qulluqçusunun şəxsi işinin aparılması” informasiya sisteminin dövlət orqanları üçün mühüm əhəmiyyətə malik olduğunu, sistemin Mərkəzin əməkdaşları tərəfindən hazırlandığını və zəruri hallarda texniki dəstəyin göstəriləcəyini qeyd edib.
Dövlət informasiya resursları departamentinin müdiri Vüqar Əkbərov “Dövlət qulluqçusunun şəxsi işinin aparılması” informasiya sistemi barədə tədbir iştirakçılarına geniş məlumat verərək, sistemin funksional imkanlarını əyani nümayiş etdirib və dövlət orqanlarında insan resurslarının idarə edilməsi sahəsində kağız dayışıyıcılardan tədricən elektron formata keçid prosesində yeni sistemin mühüm rol oynayacağını bildirib.
Təqdimat zamanı Vüqar Əkbərov, Hüquqi təminat, dövlət qulluğu məsələləri və dövlət strategiyaları ilə iş departamentinin Hüquqi təminat və dövlət qulluğu məsələləri şöbəsinin müdiri Lalə Qədirova, Dövlət informasiya resursları departamentinin Dövlət qulluqçularının reyestrinin aparılması və ehtiyat kadrların qeydiyyatı sektorunun müdiri Sakit Əliyev və Dövlət informasiya resursları departamentinin Elektron informasiya sistemləri şöbəsinin baş məsləhətçisi Elvina Məmmədova iştirakçıların yeni informasiya sistemi, dövlət qulluqçularının reyestri və dövlət qulluğu ilə bağlı müxtəlif suallarını cavablandırıblar.
Tədbir iştirakçıları tərəfindən maraqla qarşılanmış təqdimatın sonunda həm yeni sistemin imkanları, həm də dövlət qulluğu məsələləri ilə bağlı müzakirələr aparılıb.
