10 iyul 2026-cı il tarixində Dövlət İmtahan Mərkəzinin (DİM) Kembric ingilis dili imtahan mərkəzində Cambridge University Press & Assessment tərəfindən növbəti keyfiyyət audit yoxlaması həyata keçirilib.
Auditin nəticələrinə əsasən DİM imtahanların təşkili, təhlükəsizlik prosedurlarına riayət olunması, keyfiyyətin idarə edilməsi, imtahan materiallarının mühafizəsi və beynəlxalq standartlara uyğun fəaliyyətinə görə ən yüksək qiymətləndirmələrdən biri olan "Əla" ("Excellent") nəticəsini əldə edib.
Bu nəticə DİM-in Kembric ingilis dili imtahanlarının keçirilməsi sahəsində beynəlxalq standartlara tam uyğun fəaliyyət göstərdiyini, imtahanların yüksək keyfiyyətlə təşkil olunduğunu və namizədlər üçün təhlükəsiz, etibarlı və şəffaf imtahan mühitinin təmin edildiyini bir daha təsdiq edir.
Dövlət İmtahan Mərkəzi Azərbaycanda Cambridge University Press & Assessment tərəfindən səlahiyyət verilmiş Kembric İngilis dili imtahan mərkəzi kimi fəaliyyət göstərir və beynəlxalq keyfiyyət standartlarının tətbiqinə xüsusi önəm verir.
DİM bundan sonra da beynəlxalq imtahanların təşkili sahəsində ən yüksək keyfiyyət standartlarını qorumaq və namizədlərə etibarlı xidmət göstərmək istiqamətində fəaliyyətini davam etdirəcəkdir.