2023-cü il 30 may - 3 iyun tarixlərində Almaniya Federativ Respublikasının paytaxtı Berlin şəhərində Almaniya Beynəlxalq Əməkdaşlıq Təşkilatı (GİZ) və Hertie Məktəbinin birgə əməkdaşlığı ilə “Şərq tərəfdaşlığı ölkələrində təşkilati inkişaf üçün liderlikdə qadınlar” təhsil proqramının ilk mərhələsi baş tutub.
Bu il keçirilən təlimlərdə Azərbaycandan DİM-in Beynəlxalq əməkdaşlıq şöbəsinin Beynəlxalq layihələrlə iş sektorunun müdiri Ayşən Atakişiyeva, Azərbaycan Respublikasının Prezidenti yanında Dövlət İdarəçilik Akademiyasının Rəhbər kadrların yenidən hazırlanması fakültəsinin dekanı Ülkər Şəfiyeva, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin Dövlət xidmətlərinin dizaynı və innovasiyalar şöbəsinin Dövlət xidmətlərinin dizaynı sektorunun müdiri Könül Qaracayeva iştirak edib.
Təlim müddətində qadın liderlər üçün kommunikasiya, gender bərabərliyi, adaptiv liderlik kimi mövzularda təqdimatlar nümayiş olunub, qrup işləri təşkil edilib və mövzular ətrafında müzakirələr aparılıb.
2 təlim kursu və kommunikasiya olmaqla 3 mərhələdən ibarət təhsil proqramının növbəti mərhələlərinin iyul ayında keçirilməsi planlaşdırılır. Yekunda layihənin əvvəlki iştirakçıları ilə yeni iştirakçılar arasında kommunikasiya məqsədli görüşün keçirilməsi nəzərdə tutulub.
