Tədbirdə Azərbaycanın müxtəlif dövlət orqanlarının və ali təhsil müəssisələrinin nümayəndələri iştirak etmişdir. Tədbirin keçirilməsində məqsəd iştirakçıları LKY İctimai Siyasət Məktəbinin fəaliyyəti haqqında məlumatlandırmaq və orada təhsil almaq imkanları ilə tanış etmək olmuşdur.
Tədbiri giriş sözü ilə ADA Universitetinin prorektoru Fariz İsmayılzadə açaraq seminarın təşkili üçün məhz ADA Universitetinin seçildiyinə görə təşkilatçılara dərin minnətdarlığını bildirmiş və təqdim olunacaq məlumatların hər kəs üçün faydalı olacağını vurğulamışdır. Daha sonra Dövlət İmtahan Mərkəzinin Strateji inkişaf şöbəsinin müdiri Fuad Mayılov çıxış edərək Dövlət İmtahan Mərkəzi haqqında qısa məlumat vermiş və İctimai Siyasət Məktəbində təhsil almaq imkanının olmasını xüsusilə dövlət qulluqçuları üçün olduqca yaxşı fürsət olduğunu bildirmişdir. Fuad Mayılov eyni zamanda yeni qəbul olunmuş “Azərbaycan gəncliyi 2017-2021-ci illərdə” Dövlət Proqramı çərçivəsində DİM-ə həvalə olunmuş gənc dövlət qulluqçularının peşə bacarıqlarının təkmilləşdirilməsi istiqamətində müxtəlif təlimlərlə yanaşı bu tipli tədbirlərin təşkilinin də vacib olduğunu vurğulamışdır.
Tədbir zamanı LKY İctimai Siyasət Məktəbinin məzunlarla iş üzrə koordinatoru xanım Amber Vidiastuti, Məktəbin azərbaycanlı ilk məzunu Xədicə Nəsirova, qazaxıstanlı məzunlar Yernar Zarkeşov və Dinara Datbayeva Sinqapur haqqında ümumi məlumat, Məktəbdə təhsil imkanları, təlim və təhsil proqramları, qəbul qaydaları, mövcud təqaüd proqramları barədə iştirakçılara məlumat vermişlər.
Tədbirdə həmçinin, LKY İctimai Siyasət Məktəbinin təşəbbüsü ilə Qazaxıstanın paytaxtı Astanada təsis edilmiş Nazarbayev Universitetinin nəzdində yerləşən İctimai Siyasət üzrə Ali Məktəb haqqında ümumi məlumat, Məktəbə qəbul qaydaları və təqaüd proqramları barədə məlumat verilmişdir.
Tədbirin sonunda iştirakçıların sualları təşkilatçılar tərəfindən cavablandırılmışdır.
Qeyd edək ki, bu təhsil müəssisələrində dövlət qulluqçularının təhsil alması üçün müxtəlif proqramlar, həmçinin Məktəb tərəfindən xərcləri ödənilən tam təqaüd proqramları mövcuddur.
Aşağıdakı linklərə daxil olaraq daha ətraflı məlumat əldə edə bilərsiniz:
Nazarbayev Universiteti (Astana, Qazaxıstan) - http://gspp.nu.edu.kz/ru
Sinqapur Li Kuan Yu İctimai Siyasi Məktəbi - https://lkyspp.nus.edu.sg/