Tarix fənni üzrə gündəlik məsələ Azərbaycan ordusunun 19-20 sentyabr 2023-cü il tarixində Qarabağda həyata keçirdiyi antiterror tədbirlərinə həsr olunmuş elmi‑metodiki məqalənin, biologiya fənnindən isə qəbul imtahanı modelinə uyğun sınaq imtahanı üçün hazırlanmış tapşırıqların müzakirəsi olub.
Tarix fənni üzrə iclasda Azərbaycan silahlı qüvvələrinin düşmən təxribatının qarşısını almaq, ərazi bütövlüyümüzü bərpa etmək və suverenliyimizi qorumaq məqsədi ilə Qarabağda keçirdiyi antiterror tədbirlərinə həsr olunmuş məqalə müzakirə edildi. Müzakirə zamanı Ermənistanın himayəsi altında fəaliyyət göstərən qanunsuz silahlı birləşmələrin Ali Baş Komandan İlham Əliyevin tapşırığı ilə 24 saat ərzində ordumuz tərəfindən məhv edilməsi və cinayətkar xunta rejiminin təslim olmağa məcbur edilməsi, həmçinin bu tədbirlərin dünya tarixində misli görünməmiş bir antiterror əməliyyatı olması diqqətə çatdırıldı. İşçi qrupunun üzvləri tariximizdə olduqca mühüm əhəmiyyətə malik bu şanlı qələbəmiz haqqında elmi‑metodiki məqalənin hazırlanması və qəbul imtahanlarında bu məzmunda tapşırıqların təqdim edilməsinin təqdirəlayiq iş olduğunu vurğuladılar.
Biologiya fənni üzrə iclasda isə sınaq imtahanı üçün təqdim edilmiş, 6‑11-ci sinif dərslikləri əsasında hazırlanmış tapşırıqların müzakirəsi başa çatdırılıb. Ekspertlər tərəfindən bir daha yoxlandıqdan sonra sınaq üçün hazırlanmış tapşırıqların “otk.az” onlayn test portalında yerləşdirilməsi nəzərdə tutulur.
İşçi qruplarının növbəti iclasları 19 oktyabr 2023-cü il tarixində olacaq.
