Dövlət İmtahan Mərkəzi Azərbaycan Respublikası Prezidentinin 2022-ci il 17 sentyabr tarixli Fərmanı ilə təsdiq edilmiş çap mediası subyektinin təsisçisi ola bilən dövlət orqanlarının (qurumlarının) siyahısında yer alıb.
Müvafiq Fərmanla buradan tanış ola bilərsiniz.
Məlumat üçün qeyd edək ki, Dövlət İmtahan Mərkəzi “Abituriyent” jurnalının təsisçisidir. Jurnal Dövlət İmtahan Mərkəzinin (əvvəlki Tələbə Qəbulu üzrə Dövlət Komissiyasının) nizamnaməsinə uyğun olaraq 1996-cı ildə təsisis edilib və Ədliyyə Nazirliyinin 16 sentyabr 1996-cı il tarixli, D 1567 saylı, Respublika Mətbuat və İnformasiya Nazirliyinin 18 fevral 1999-cu il tarixli, B 171 saylı qərarı ilə dövlət qeydiyyatından keçib.
“Abituriyent” jurnalı abituriyentlər, şagirdlər və digər şəxslərin bakalavriatura, magistratura, rezidentura, dövlət qulluğu, eləcə də DİM tərəfindən keçirilən müxtəlif təyinatlı imtahanlara müstəqil şəklidə hazırlaşmaları üçün elmi-metodiki və informativ materialların çap olunduğu rəsmi müntəzəm nəşrdir.
Nəşr edildiyi müddətdə ictimaiyyətin artan maraq və tələbatına uyğun olaraq jurnalın tirajı da ilbəil artıb.
Jurnal ölkədə ən çox oxunan və istifadə olunan nəşrlərdən biridir və respublikanın bütün şəhər və rayonlarına çatdırılır.
Jurnalda müxtəlif təhsil pillələri və səviyyələri üzrə aşağıdakı növ materiallar və vəsaitlər çap olunur:
- “Abituriyent” jurnalı və onun xüsusi buraxılışları (“Magistr”, “Rezidentura”, “Dövlət qulluğu”, “Peşəkar mühasib” xüsusi buraxılışları);
- metodiki vəsaitlər;
- qiymətləndirmə tapşırıqları;
- test topluları;
- peşəyönümü xarakterli vəsaitlər;
- elmi-statistik araşdırmalar və onların nəticələrinə dair materiallar.
Nəşrlər haqqında daha ətraflı məlumatla keçiddən (http://abiturient.az/Abituriyent_jurnali_barede_melumat.pdf) tanış ola bilərsiniz.
