21 avqust 2023-cü il tarixində ACCA (İmtiyazlı Sertifikatlaşdırılmış Mühasiblər Assosiasiyası) tərəfindən peşəkar mühasib sertifikatı (PMS) imtahanlarında istifadə edilən test tapşırıqlarının və digər yoxlama-ölçmə materiallarının hazırlanması ilə əlaqədar görülən işlərə cəlb olunan mütəxəssislər üçün onlayn təlim keçirilib.
Təlimdə Dövlət İmtahan Mərkəzi və Maliyyə Nazirliyinin 32 əməkdaşı iştirak edib.
Təlimin məqsədi tapşırıqların hazırlanmasında mütəxəssislərin peşəkarlılığının artırılması və ACCA təcrübəsinin öyrənilməsi olub.
Təlimi giriş sözü ilə açan ACCA-in regional bazarın inkişafı üzrə meneceri Ülgen Coşkun iştirakçıları salamlayaraq DİM və ACCA arasındakı əməkdaşlıq çərçivəsində görülən işlər barədə məlumat verib.
Daha sonra təlimçilər - mütəxəssis həllər üzrə rəhbər Reyçl Norman və kvalifikasiyanın inkişafı üzrə rəhbər Metyu Holl ACCA imtahan prosesi, qiymətləndirmə strategiyası, imtahanın strukturu, obyektiv test sualları, kazus tipli suallar, qiymətlərin bölüşdürülməsi, icmal prosesi, iterativ təkmilləşdirmələr mövzusunda təqdimatlar nümayiş etdirərək iştirakçılarla birgə müxtəlif tipli sualların hazırlanmasına dair nümunələri müzakirə ediblər.
4 saat davam edən təlimin sonunda iştirakçıların sualları cavablandırılıb.
Qeyd edək ki, DİM ACCA ilə olan əlaqələrini 1 sentyabr 2021-ci il tarixində imzalanan memoranduma uyğun olaraq peşəkar səriştə, bacarıq və texniki biliklər sahəsində öyrənmə və inkişaf imkanlarını araşdırmaq istiqamətində birgə fəaliyyət göstərirlər.
