3–7 noyabr 2025-ci il tarixlərində Azərbaycan Respublikasının Dövlət İmtahan Mərkəzinin (DİM) və Dövlət İdarəçilik Akademiyasının əməkdaşları üçün Almaniya Beynəlxalq Əməkdaşlıq Cəmiyyətinin (GIZ) Şərq Tərəfdaşlığı Proqramı çərçivəsində “Təlimçilər üçün təlim” mövzusunda beş günlük təlim təşkil olunub. Təlimlər DİM-in elektron imtahanlar korpusunda keçirilib və təcrübəli təlimçilər İrina Aghapişvili və Hans Rieger tərəfindən aparılıb.
Təlimin əsas məqsədi iştirakçıların təlim dizaynı, tədris strategiyaları, kommunikasiya bacarıqları və müasir təlim texnologiyalarından istifadə sahəsində bilik və bacarıqlarını artırmaq, eləcə də gələcəkdə müxtəlif istiqamətlərdə təlimçi kimi fəaliyyət göstərə biləcək potensial kadrların formalaşdırılması olub.
Təlimlər mühazirə, müzakirə, sual-cavab, praktiki tapşırıqlar, qrup işləri, rol oyunları və video-analiz kimi müxtəlif metodları özündə birləşdirib. Təlimin bütün günləri fərqli mövzulara və praktiki təcrübəyə əsaslanan modullardan ibarət olub.
Təlimin ilk günü iştirakçılar proqramın məqsədi, quruluşu və metodologiyası ilə tanış olublar. Sessiyalar zamanı müxtəlif öyrənmə tipləri və sosial öyrənmə formaları müzakirə edilib, praktiki tapşırıqlar vasitəsilə təlim modullarının planlaşdırılması üzrə bacarıqlar inkişaf etdirilib.
Təlimin növbəti günlərində sessiyalar neyrodidaktika, öyrənmənin psixoloji mexanizmləri, kommunikasiya və motivasiya texnikaları kimi mövzuları əhatə edib. İştirakçılar müxtəlif təlim metodlarını – mühazirə, problem həlli, fəaliyyət yönümlü və interaktiv yanaşmaları praktiki şəkildə tətbiq ediblər. Qrup təqdimatları videoformatda izlənilərək təlimçilər tərəfindən təhlil olunub. Sonrakı mərhələlərdə “Təlimlərin dəyərləndirilməsi” mövzusunda 4 ölçülü qiymətləndirmə modeli təqdim edilib, rəqəmsal alətlərin istifadəsi və süni intellektin təlim prosesində tətbiqi üzrə praktiki məşğələlər aparılıb. İştirakçılar həmçinin onlayn təlimlərin idarə olunması və müxtəlif hədəf qrupları ilə işləmək bacarıqlarını təkmilləşdiriblər.
Təlimin sonunda iştirakçlar sertifikat ilə təltif olunublar.
