11 iyun 2024-cü il tarixində Bakıda Azərbaycan – Birləşmiş Ərəb Əmirlikləri (BƏƏ) nazirlərinin Təcrübə Mübadiləsi Forumu işə başlayıb.
Tədbir Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin və BƏƏ-nin Kabinet İşləri Nazirliyinin birgə təşkilatçılığı ilə reallaşdırılır. “Azərbaycan Respublikası Hökuməti ilə Birləşmiş Ərəb Əmirlikləri Hökuməti arasında hökumət təcrübələrinin mübadiləsi üzrə əməkdaşlığa dair Anlaşma Memorandumu"nun icrası çərçivəsində baş tutan Forumda əmirliklərin müxtəlif sahələr üzrə 30‑a yaxın, o cümlədən ölkəmizin yüksək vəzifəli rəsmiləri iştirak edirlər.
Forumun əsas məqsədi dövlət xidmətlərinin göstərilməsi sahəsində innovasiyalar və texnologiyaların təşviqi, qlobal cəmiyyət üçün sağlamlıq sistemlərinin inkişafı, iqtisadi dirçəlişi sürətləndirmək üçün müvafiq çərçivə və siyasətlərin müəyyən edilməsi, təhsil sahəsində əldə olunmuş yeni nailiyyətlər, sosial rifah sahəsində baş vermiş dəyişikliklər, habelə Azərbaycanın COP29 tədbirinə ev sahibliyi ilə əlaqədar ətraf mühit və yaşıl enerji kimi mövzular ilə bağlı ən son tendensiyaları müzakirə etməkdir.
Tədbirin birinci günündə ardıcıl olaraq Azərbaycan və BƏƏ-nin nazir və nazir müavinlərinin çıxışları baş tutub və müvafiq istiqamətlər üzrə iki ölkənin əldə etdiyi qabaqcıl təcrübələr təqdim olunub.
Forumda Dövlət İmtahan Mərkəzinin Direktorlar Şurasının sədr müavini Bəhrəm Xəlilov “Dövlət İmtahan Mərkəzi tərəfindən xidmətlərin göstərilməsi sahəsində innovasiyalar və texnologiyaların təşviqi” mövzusunda çıxış edib. B.Xəlilov müşahidə olunan texnoloji dəyişikliklər şəraitində rəqəmsal bacarıqlara malik, yeni texnologiyaları aktiv tətbiq edə bilən, artan rəqabətə hazır olan, zəruri bilik, bacarıq, təcrübə və səriştələrə malik yüksəkixtisaslı insan kapitalının formalaşdırılmasının xüsusi əhəmiyyət kəsb etdiyini qeyd edib. Sədr müavini dövlət qulluğu sisteminin inkişafı məqsədilə institusional quruculuq, kadr siyasəti, dövlət qulluqçularının rotasiyası, onların peşəkarlığının və fəaliyyətinin səmərəliliyinin artırılması, dövlət qulluğunda səriştə (kompetensiya) və mütərəqqi motivasiya (həvəsləndirmə) modellərinin tətbiqi, dövlət qulluğunun informasiya təminatının yaxşılaşdırılması sahəsində aparılan əsaslı islahatlar haqqında məlumat verib.
Forum çərçivəsində B.Xəlilov və BƏƏ hökumətinin insan resursları üzrə federal orqanının baş direktoru xanım Laila Obaid arasında ikitərəfli görüş keçirilib. Görüş zamanı Dövlət İmtahan Mərkəzinin fəaliyyəti, Azərbaycanda dövlət qulluğuna qəbul, dövlət qulluğuna aid qanunvericilik və aparılan islahatlar haqqında fikir mübadiləsi aparılıb və gələcək əməkdaşlıq imkanları müzakirə olunub.
Forumun ikinci günü müxtəlif mövzuda dəyirmi masa formatında paralel sessiyaların təşkil edilməsi nəzərdə tutulur.