Seminarın gündəlik məsələləri:
1. Dövlət İmtahan Mərkəzinin həyata keçirdiyi yeni layihələr və nəşr işləri barədə təqdimat;
2. Seminarın iş planının müzakirəsi və təsdiqi;
3. Ümumi (9 illik) orta təhsil səviyyəsi üzrə buraxılış imtahanı proqramının müzakirəsi olub.
Seminarlarda Bakı, Sumqayıt şəhərlərinin, Abşeron rayonunun ümumtəhsil və ali təhsil müəssisələrinin müəllimləri, metodistlər, AMEA-nın müvafiq sahə üzrə mütəxəssisləri iştirak ediblər.
DİM-in şöbə müdiri A.Batıyeva yeni dərs ilinə Mərkəz tərəfindən təqdim edilən yeni layihələr və nəşr işləri barədə təqdimatla çıxış etdi. Fənlər üzrə DİM-in Youtube kanalında yerləşdirilmiş vizual dərslər haqqında məlumat verdi, Azərbaycan dili fənnindən bir dərsi nümayiş etdirdi. Dərsliklərin tədris vahidləri və mövzuları əsasında onlayn sınaq variantlarının hazırlanması haqqında geniş məlumat verərək, otk.az saytında yerləşdirilmiş hər bir layihə üzrə bir variant təqdim etdi. Bu layihələr şagirdlərin müstəqil olaraq buraxılış imtahanlarına hazırlaşmalarına yönəlib. A.Batıyeva həmçinin dərsliklər əsasında siniflər üzrə hazırlanmış qiymətləndirmə tapşırıqları kitabçalarının tamamilə fənn kurikulumunda nəzərdə tutulmuş təlim nəticələrinə uyğun olduğunu qeyd etdi. Bildirdi ki, 5-11-ci siniflər üzrə kitabçalar nəşr edilib. İmtahanlara hazırlaşanlar, şagirdlər və müəllimlər üçün nəzərdə tutulmuş “Azərbaycan dili” vəsaiti haqqında da məlumat verdi. DİM-də yeni layihə olan 1-4-cü sinif dərslikləri əsasında fənn kurikulumlarına uyğun olaraq Azərbaycan dili, rus dili və riyaziyyat (Azərbaycan və rus bölmələri üzrə) fənlərindən qiymətləndirmə tapşırıqları kitabçalarının hazırlanması haqqında da ətraflı danışdı.
Qeyd etdi ki, DİM-də görülən işlər, təqdim edilən layihələr beynəlxalq standartlara tam uyğundur. Bunu 22-27 sentyabr tarixində DİM-in təşkilatçılığı ilə Bakı şəhərində keçirilmiş Təhsilin Qiymətləndirilməsi üzrə Beynəlxalq Assosiasiyanın (IAEA) “Qiymətləndirmə və qərarvermə: fərdi və institusional həll yolları” mövzusunda 45-ci illik konfransının iştirakçıları da təsdiq ediblər.
Həmçinin o bildirdi ki, ümumtəhsil müəssisələrində istifadədə olan dərsliklərin monitorinqi aparılır, dərsliklərdəki materialların kurikulumlara uyğunluğu yoxlanılır, səhvlər, mübahisəli məqamlar varsa, dəqiqləşdirilir və rəylər hazırlanır. 9-illik və 11-illik təhsil bazasında buraxılış imtahanlarının məzmunu ilə bağlı materiallar – proqramlar, seçilmiş alt standartlar, yeni tapşırıq nümunələri və qiymətləndirmə meyarları hazırlanırarkən monitorinq rəyləri nəzərə alınır. Məzmun ilə bağlı materiallar “Abituriyent” jurnalınının xüsusi buraxılışlarında dərc edilir.
Sonra Azərbaycan dili fənni üzrə seminarın rəhbəri f.ü.f.d. prof. T.Hacıyev iştirakçıları seminarın iş planı ilə tanış etdi. İş planı müzakirə edilərək təsdiq olundu. Daha sonra isə ümumi (9 illik) orta təhsil səviyyəsi üzrə buraxılış imtahanı proqramının müzakirəsi oldu.
Seminar iştirakçıları gündəlik məsələ barədə fikir və təkliflərini bildirdilər.
Növbəti seminarda (21 oktyabr 2019-cu il tarixdə, saat 13:30-da; Ünvan: Abdulvahab Salamzadə küçəsi 28, keçmiş Bakı Asiya Universitetinin binası, 4-cü mərtəbə, akt zalı) buraxılış imtahanları proqramlarının müzakirəsı davam etdiriləcək.
