“Azərbaycanda dövlət qulluğu sistemində islahatlara dəstək” texniki yardım layihəsi çərçivəsində “Səriştələrə əsaslanan vasitələrin hazırlanması və ötürülməsi üzrə potensialın artırılması” mövzusunda ümumilikdə 5 gün olmaqla beynəlxalq ekspertlər Eduard Zakharchenko, Rachel Frost və Vesselin Kantchev tərəfindən 20 nəfər müstəqil ekspert üçün iki hissəli və hibrid formatlı (həm onlayn, həm də əyani) təlim keçirilib.
Təlimin ilk hissəsi 30 və 31 oktyabr tarixlərində keçirilib. İlk gün ekspert Eduard Zakharchenko iştirakçılarla təlimin məzmunu və məqsədləri barədə müzakirələr aparıb və iştirakçıların təlimdən gözləntilərini müəyyənləşdirilib. Təlimin davamında ORCE metodu (müşahidə et, qeyd et, təsnif et, qiymətləndir) və qiymətləndirmə metodları ilə bağlı ən son vəziyyət dəyərləndirilib, həmçinin iştirakçılarla namizəd seçimində müxtəlifliyin əhəmiyyətini anlamaq və qiymətləndirmək üçün qeyri-ixtiyari qərəzliliyin əsasları haqqda fikir mübadiləsi aparılıb.
Təlimin ikinci günü Situasiya Mühakimə Testləri (Situational Judgement Test – SJT) yazmaq istiqamətində ekspert olan Rachel Frost onlayn formatda təlimə qoşulub. O SJT sisteminin əhəmiyyətini, onun məzmununu və yanaşmalarını vurğulayıb, SJT və səriştələrin ölçülməsində istifadə olunan qiymətləndirmə alətlərinin uyğunluğu barədə geniş müzakirə aparıb. Təlimin ilk hissəsinin son günündə ekspert Eduard Zakharchenko müsahibələrdə ən yaxşı təcrübə üzrə nəzəriyyə və prinsiplər üzrə təqdimatlar nümayiş edib, fərdi və qrup tapşırıqları yerinə yetirilib.
Təlimin ikinci hissəsi 22-24 noyabr tarixlərində keçirilib. Ekspert Eduard Zakharchenko tərəfindən obyektiv/subyektiv seçimlər və qurumun planlaması arasındakı əlaqə ilə bağlı məsələlərin dərinləşdirilməsi mövzusunda təqdimatlar göstərilib. Təlimin son günü ekspert Vesselin Kantchev tərəfindən müsahibələr və müsahibə nəticələrinin qiymətləndirilməsi üzrə təqdimatlar nümayiş edilib.
Qeyd edək ki, təlimin sonunda iştirakçılara ekspert Eduard Zakharchenko tərəfindən sertifikatlar təqdim edilib.
Xatırladaq ki, Avropa İttifaqı tərəfindən maliyyələşdirilən "Azərbaycanda dövlət qulluğu sistemində islahatlara dəstək" 2022-2023 texniki yardım layihəsi “Azərbaycan Respublikasında dövlət qulluğunun inkişafına dair 2019-2025-ci illər üçün Strategiya”nın həyata keçirilməsinə töhfə vermək məqsədi daşıyır.
