Seminarın gündəlik məsələləri:
1. Dövlət İmtahan Mərkəzinin həyata keçirdiyi yeni layihələr və nəşr işləri barədə təqdimat;
2. Seminarın iş planının müzakirəsi və təsdiqi olub.
Seminarda Bakı, Sumqayıt şəhərlərinin, Abşeron rayonunun ümumtəhsil və ali təhsil müəssisələrinin müəllimləri, metodistlər, AMEA-nın müvafiq sahə üzrə mütəxəssisləri iştirak edib.
DİM-in şöbə müdiri Afiqə Batıyeva seminarların təşkil edilməsi və onların əhəmiyyəti, dərsliklər əsasında vizual dərslərin hazırlanması, dərsliklərdəki tədris vahidləri və mövzular üzrə tapşırıq nümunələrindən ibarət sınaq variantlarının hazırlanması, imtahanlara müstəqil hazırlaşmaq üçün metodiki materialların nəşr edilməsi, 1-4-cü sinif dərslikləri əsasında fənn kurikulumlarına uyğun olaraq Azərbaycan dili, rus dili və riyaziyyat (Azərbaycan və rus bölmələri üzrə) fənlərindən qiymətləndirmə tapşırıqları kitabçalarının hazırlanması, həmçinin 22-27 sentyabr tarixində DİM-in təşkilatçılığı ilə Bakı şəhərində keçirilmiş Təhsilin Qiymətləndirilməsi üzrə Beynəlxalq Assosiasiyanın “Qiymətləndirmə və qərarvermə: fərdi və institusional həll yolları” mövzusunda 45-ci illik konfransı haqqında məlumat verdi. Həmçinin, o bildirdi ki, elmi-metodiki seminarlarda buraxılış və qəbul imtahanlarının məzmunu ilə bağlı və imtahanlara hazırlaşan gənclərə, şagirdlərə, müəllimlərə metodik köməklik baxımından materiallar hazırlanır, müzakirələr aparılır, ümumtəhsil müəssisələrində istifadədə olan dərsliklərin monitorinqi aparılır, dərsliklərdəki materialların kurikulumlara uyğunluğu yoxlanılır, səhvlər, mübahisəli məqamlar varsa, dəqiqləşdirilir və rəylər hazırlanır. İmtahanlarla bağlı materiallar – proqramlar, seçilmiş alt standartlar, yeni tapşırıq nümunələri və qiymətləndirmə meyarları “Abituriyent” jurnalında dərc edilir.
Daha sonra coğrafiya fənni üzrə seminarın rəhbəri c.e.d. F. İmanov və riyaziyyat fənni üzrə seminarın rəhbəri f.-r.e.d. M. Yaqubov iştirakçıları seminarın iş planı ilə tanış etdi. İş planı müzakirə edilərək təsdiq olundu.
Növbəti seminarda (18 oktyabr 2019-cu il tarixdə, coğrafiya fənni üzrə saat 10:00-da, riyaziyyat fənni üzrə saat 12:30-da; Ünvan: Abdulvahab Salamzadə küçəsi 28, keçmiş Bakı Asiya Universitetinin binası, 4-cü mərtəbə, akt zalı) buraxılış imtahanları, hərbi liseylərə və ali təhsil müəsisələrinə qəbul imtahanlarının proqramları müzakirə ediləcək.
