“ADA” Universitetində təşkil edilən və 10-19 aprel tarixləri ərzində davam edən “Məşğulluq həftəsi” layihəsində universitetin müxtəlif fəaliyyət istiqamətləri üzrə tərəfdaş qurumlarının əməkdaşları tərəfindən tələbələrə 7 gün davam edən təlimlər keçirilib. DİM-in əməkdaşları “ADA” Universitetinin dəvəti ilə layihədə iştirak edən qurumlardan biri olaraq tələbələrə müxtəlif mövzularda təlimlər keçiblər.
“Məşğulluq həftəsi” layihəsi və keçirilən təlimlərin məqsədi əmək bazarında olan karyera tendensiyaları ilə bağlı “ADA” Universitetinin 2-4-cü kurs və magistratura tələbələri arasında məlumatlılığı artırmaq və tələbələrlə potensial işəgötürənlər arasında əlaqə yaratmaq, o cümlədən spesifik fəaliyyət sahələri ilə əlaqədar zəruri texniki biliklər barədə iştirakçıları məlumatlandırmaqdan ibarət olub.
Təlimlərin sonunda hər bir qurum təlimlərdə iştirak etmiş tələbələr üçün yekun qiymətləndirmə həyata keçirib.
Bağlanış mərasimində qurumlar qiymətləndirmə mərhələsinə əsasən qalib gəlmiş tələbələri elan edib. DİM tərəfindən aparılan qiymətləndirmə nəticəsində ən yüksək nəticə göstərmiş 5 tələbə DİM-də 2 aylıq təcrübə proqramında iştirak etmək imkanı əldə edib. Eyni zamanda, DİM “Məşğulluq həftəsi” layihəsində tələbələrin professional inkişafına verdiyi töhfəyə görə diplomla təltif olunub.
Qeyd edək ki, təlimlər yekunlaşdıqdan sonra 26 aprel 2023-cü il tarixində layihənin iştirakçıları DİM-in inzibati binasına dəvət olunublar. “ADA” Universitetinin bakalavr və magistr olmaqla 12 tələbəsi DİM-də yaradılmış və ölkəmizin milli qiymətləndirmə sisteminin tarixini əks etdirən muzey, eləcə də qəbul imtahanları ilə bağlı ölkə üzrə statistik məlumatları əks etdirən Azərbaycan Respublikasının elektron xəritəsi ilə tanış olublar. Sonda tələbələrə DİM tərəfindən keçirilən təlimlərdə iştirak etdikləri üçün hədiyyələr təqdim edilib.
Xatırladaq ki, DİM ötən il də “Məşğulluq həftəsi” layihəsində iştirak etmişdir. Təlimlərin sonunda 3 nəfər təlim iştirakçısı DİM-də 2 aylıq təcrübə proqramında iştirak edib və təcrübəçilərdən biri hal-hazırda DİM-in Beynəlxalq əməkdaşlıq şöbəsində çalışır.