Dövlət İmtahan Mərkəzi “Azərbaycan Respublikasında dövlət qulluğunun inkişafına dair 2019-2025-ci illər üzrə Strategiya”nın 2023-2025-ci illərdə icrası üzrə Fəaliyyət Planında nəzərdə tutulmuş tədbirlərin icrasının təmin edilməsi məqsədilə mütəmadi olaraq respublikanın müxtəlif ali təhsil müəssisələrində tələbə və gənclərlə görüşlər təşkil edir. Bu məqsədlə, 14 may 2024-cü il tarixində Dövlət İmtahan Mərkəzinin təşkilatçılığı ilə ADPU-nun Quba filialında “Gənclərin dövlət qulluğu sahəsində biliklərinin artırılması” mövzusunda tədbir keçirilib.
İclasda çıxış edən filialın direktoru dos.Yusif Alıyev kadr siyasəti haqqında danışıb və dövlət qulluğunun inkişafı istiqamətində həyata keçirilən tədbirlər barədə gənclərin məlumatlandırılmasına həsr edilən görüşlərin əhəmiyyətini vurğulayıb.
Tədbirdə çıxış edən DİM-in Xaçmaz Regional Bölməsinin müdiri Faiq Nadirsoy son dövrlər regionda gənclərin dövlət qulluğu sahəsində keçirilən imtahanlarda iştirak dinamikası haqqında məlumat verib, DİM-nin fəaliyyətində səmərəliliyin artırılması istiqamətində həm Bakıda, həm də bölgələrdə görülən işləri qeyd edib.
Sonra Dövlət İmtahan Mərkəzinin Dövlət strategiyası ilə iş və insan kapitalının inkişafı şöbəsinin müdiri Elnur Abbasov dövlət qulluğuna qəbul mexanizmləri, dövlət qulluğu imtahanlarının tarixi və iştirak qaydaları, dövlət qulluğu sisteminin mahiyyəti və əhəmiyyəti, dövlət qulluğu sahəsində son bir il ərzində həyata keçirilən yeniliklər, dövlət qulluğu sahəsində elektron xidmətlər, dövlət qulluqçusu anlayışı, dövlət qulluqçusunun əsas vəzifələri və hüquqları, dövlət qulluqçuları üçün təminatlar, qulluqda fəaliyyətin davam etdirilməsi şərtləri haqqında geniş məlumat verib, Azərbaycanda dövlət qulluğuna qəbul qaydaları, formaları və dövlət qulluğu siyasətinin əsas strategiyaları barəsində bukletləri təqdim edib.
Yekunda tədbir iştirakçılarını maraqlandıran suallar cavablandırılıb, mövzu ətrafında müzakirələr aparılıb.
Qeyd edək ki, tədbirdə 200-dən çox iştirakçı olub.
