Hazırlıq kurslarında yalnız elektron qeydiyyatdan keçmiş, ixtisası müvafiq fənlərə uyğun müəllimlər, metodistlər, pedaqoji yönümlü ali təhsil müəssisələrinin bakalavriat səviyyəsinin müvafiq fənn üzrə təhsil alan axırıncı kurs tələbələri və həmin müəssisələrdə təhsil alan magistrlər iştirak ediblər.
Dövlət İmtahan Mərkəzinin şöbə müdiri Afiqə Batıyeva hazırlıq kurslarının proqramı haqqında məlumat verib.
Tarix fənni üzrə Royal Qulusoy, Azərbaycan dili fənni üzrə Sevinc Hacıyeva, ingilis dili fənni üzrə Könül Həsənova, fizika fənni üzrə moderator Əlövsət Rəcəbli, biologiya fənni üzrə moderator Eynulla Musayev və coğrafiya fənni üzrə moderator Nərminə Seyfullayeva müvafiq fənn kurikulumu və imtahanlarda mənimsənilmə səviyyəsinin yoxlanılması və qiymətləndirilməsi mümkün olan alt standartlar, onları reallaşdıran mövzular, yeni tip qiymətləndirmə vasitələrinin formaları, məzmunu və onların qiymətləndirmə meyarlarının hazırlanması ilə bağlı təqdimatlar ediblər.
Sonuncu mərhələdə kurs iştirakçıları kalibrləmə prosesindən keçiblər. Müdavimlərə kurs keçdikləri barədə sertifikat veriləcək.
Hazırlıq kursunun müdavimlərinin şəxsi məlumatları Mərkəzin elektron “Məlumat bazası”na daxil ediləcək. Sertifikat almış müdavimlər qiymətləndirmə vasitələrinin hazırlanması və yoxlanılmasına (marker kimi) cəlb ediləcəklər.
Seminarların əvvəlində də Dövlət İmtahan Mərkəzinin şöbə müdiri Afiqə Batıyeva buraxılış imtahanlarının yeni qaydaları haqqında məlumat verib və müəllimləri maraqlandıran sualları cavablandırıb.
Seminarlarda Bərdə, Tərtər, Ağdam, Yevlax, Ağcabədi, Beyləqan, Füzuli, Xocavənd və Laçın rayonlarının ingilis, rus, alman və fransız dili müəllimləri və Təhsil Şöbələrinin xarici dil fənləri üzrə metodistləri iştirak ediblər.
İngilis dili fənni üzrə Dövlət İmtahan Mərkəzinin Metodika və dərsliklərin monitorinqi şöbəsinin böyük məsləhətçisi Könül Həsənova, rus dili fənni üzrə Azərbaycan Turizm və Menecment universitetinin baş müəllimi Afət Mürsəliyeva, fransız dili fənni üzrə Azərbaycan Dillər Universitetinin professoru, filologiya üzrə fəlsəfə doktoru Çəmən Babaxanova, alman dili fənni üzrə isə Azərbaycan Dillər Universitetinin dosenti Raya Həsənova buraxılış (9 və 11-illik təhsil bazaları əsasında) imtahanlarında mənimsənilmə səviyyəsinin yoxlanılması mümkün olan alt standartlar, proqramlar haqqında məlumat verərək, test tapşırığı nümunələri və qiymətləndirmə meyarları haqqında təqdimatla çıxış ediblər.
Təqdimatlar ətrafında müzakirələr aparılıb. Seminarlarda müzakirə edilmiş məsələlər haqqında iştirakçıları maraqlandıran suallar cavablandırılıb.
