13 iyul 2026-cı il tarixində Dövlət İmtahan Mərkəzində (DİM) ilk dəfə olaraq Cambridge English: Young Learners Qualifications (YLE) imtahanının Movers səviyyəsi üzrə kompüter əsaslı imtahan keçirilib.
Bununla da DİM ölkəmizdə Cambridge English: Young Learners Qualifications imtahanlarının həm Starters, həm də Movers səviyyələrini kompüter əsaslı formatda keçirən ilk imtahan mərkəzi olub.
Cambridge Universiteti Nəşriyyat və Qiymətləndirmə qurumu ilə əməkdaşlıq çərçivəsində təşkil olunan imtahan beynəlxalq standartlara uyğun şəkildə keçirilib və namizədlərə ingilis dili biliklərini müasir rəqəmsal mühitdə nümayiş etdirmək imkanı yaradıb.
Hazırda namizədlər Starters və Movers səviyyələri üzrə həm kağız əsaslı, həm də kompüter əsaslı format arasında seçim edə bilirlər. Lakin yaxın gələcəkdə DİM-də bu səviyyələr üzrə imtahanların yalnız kompüter əsaslı formatda təşkili nəzərdə tutulur. Bu, beynəlxalq qiymətləndirmə sahəsində rəqəmsallaşma istiqamətində atılan mühüm addımlardan biridir.
DİM beynəlxalq tərəfdaşları ilə əməkdaşlığı çərçivəsində Azərbaycanda beynəlxalq imtahanların müasir standartlara uyğun və innovativ formatlarda təşkili istiqamətində fəaliyyətini uğurla davam etdirəcək.