12 aprel 2023-cü il tarixində Dövlət Qulluğu üzrə Astana Regional Xabın (Regional Xab), Qırğızıstan Dövlət İdarəçilik Akademiyasının və Hanns Seidel Fondunun birgə təşkilatçılığı ilə “Dünyada dövlət idarəçiliyi və dövlət qulluğu” adlı konfrans keçirilib. Konfrans onlayn keçirilib və Azərbaycanın dövlət qulluğu sisteminə həsr olunub.
Konfransı giriş sözü ilə açan Qırğızıstan Respublikasının Prezidenti yanında Dövlət İdarəçilik Akademiyasının rektoru Almazbek Akmatəliyev güclü dövlət qulluğu sisteminin önəmi barədə məlumat verib və iki ölkə arasında olan əlaqələri vurğulayıb. Astana Dövlət Qulluğu Xabının Rəhbər Komitəsinin sədri Əlixan Baymenov dünyada dövlət idarəçiliyi sistemində olan yenilikləri qeyd edərək, Azərbaycanın bu sahədə olan təcrübəsi barədə qısa məlumat verib.
Konfransda Dövlət İmtahan Mərkəzinin Direktorlar Şurasının sədr müavini Bəhram Xəlilov “Azərbaycanda dövlət idarəetmə sistemi, onun güclü və zəif tərəfləri – daxili baxış” mövzusunda mühazirə deyib. B.Xəlilov öz çıxışında dövlət idarəçiliyi, dövlət qulluğu sistemi, Azərbaycanda aparılan islahatlar, “Azərbaycan Respublikasında dövlət qulluğunun inkişafına dair 2019-2025-ci illər üçün Strategiya”sı, dövlət qulluğu sahəsində beynəlxalq əməkdaşlıq və yaradılan səriştə modeli barədə danışıb, eyni zamanda DİM‑in fəaliyyət istiqamətləri haqqında tədbir iştirakçılarınа geniş məlumat verib və müzakirələr zamanı verilən sualları cavablandırılıb.
Dövlət idarəçiliyi sahəsində bilik və təcrübə mübadiləsi məqsədini daşıyan bu tədbirdə Qırğızıstanın 10 dövlət qulluqçusu və Qırğızıstan Respublikasının Prezidenti yanında Dövlət İdarəçilik Akademiyasının 30 tələbəsi də iştirak edib.
