21 iyun 2022-ci il tarixində DİM-də Azərbaycanda səfərdə olan ACCA-in (İmtiyazlı Sertifikatlaşdırılmış Mühasiblər Assosiasiyası) Türkiyə Regional Mərkəzinin nümayəndələri ilə görüş keçirilib.
Görüşdə DİM-in Direktorlar Şurasının sədri Məleykə Abbaszadə, sədr müavini Namiq Babayev, daxili auditor Elmar Abasov, Yoxlama-ölçmə materiallarının işlənməsi departamentinin müdiri Natiq Əliyev, Strateji inkişaf şöbəsinin müdiri Vəli Hüseyn, Maliyyə şöbəsinin müdiri İlqar İsayev və ACCA-in Türkiyə Regional Mərkəzinin rəhbəri Filiz Demiröz, bazarın inkişafı və genişləndirilməsi üzrə meneceri Ülgen Kıymık Coşkun iştirak ediblər.
Görüşdə tərəflər gələcək əməkdaşlıq perspektivləri, Peşəkar Mühasib Sertifikatı (PMS) imtahanlarının təkmilləşdirilməsi istiqamətində ortaq layihələrin həyata keçirilməsi, PMS sahibi olan şəxslərin ACCA-in müvafiq modullarından azad olması mexanizmləri, maliyyə və mühasibatlıq sahəsinə dair peşəkar inkişaf proqramlarının hazırlaması kimi məsələləri müzakirə ediblər.
Xatırladaq ki, Dövlət İmtahan Mərkəzi ilə ACCA (İmtiyazlı Sertifikatlaşdırılmış Mühasiblər Assosiasiyası) 1 sentyabr 2021-ci il tarixində imzaladıqları Anlaşma Memorandumuna əsasən, rəsmi əməkdaşlığa başlayıblar. Qurumlar arasındakı əməkdaşlıq peşəkar səriştə, bacarıq və texniki biliklər sahəsində öyrənmə və inkişaf imkanlarının araşdırılması, ACCA kvalifikasiyaları və sertifikatları haqqında məlumatlılığın artırılması və tanıdılması üçün birgə fəaliyyət və tədbirlərin həyata keçirilməsi, mühasibatlıq və maliyyə sahəsində uğurlu karyera qurmaq üçün tələbələrin təlim və inkişafını dəstəkləmək məqsədilə birgə proqramların təşkil edilməsi də daxil olmaqla geniş əhatə dairəsinə malikdir.
Qeyd edək ki, görüşdən əvvəl ACCA-in Türkiyə Regional Mərkəzinin nümayəndələri DİM-də yaradılmış və ölkəmizin milli qiymətləndirmə sisteminin tarixini əks etdirən muzeylə, həmçinin imtahan materiallarının avtomatlaşdırılmış çap prosesi ilə tanış olublar.
