18 noyabr 2022-ci il tarixində Dövlət İmtahan Mərkəzinin Direktorlar Şurasının sədri Məleykə Abbaszadə “Yüksəliş” müsabiqəsinin ekspertlər qrupu ilə “İnsan kapitalı: qiymətləndirmə və inkişaf” mövzusuna həsr olunan görüş keçirib. İclasda 35 nəfər iştirak edib.
Qeyd edək ki, bu görüş I və II “Yüksəliş” müsabiqəsində iştirak edən ekspertləri bir araya gətirən, üzvlər arasında təcrübə mübadiləsi aparmaq, faydalı mövzularda təlimlər təşkil etmək, sosial layihələr həyata keçirmək və bir komanda olaraq daimi ünsiyyət saxlamaq məqsədilə yaradılmış “Ekspertlər klubu”nun ilk toplantısıdır.
Görüşdə DİM-in müsabiqə zamanı iştirakçıların bilik və kompetensiyalarının ölçülməsində rolu, dünya təcrübəsində insan kapitalının qiymətləndirilməsi sahəsində mövcud tendensiyalar və eyni zamanda onların Azərbaycanda tətbiqi zamanı yarana biləcək çətinliklər və real imkanlar barədə müzakirələr aparılıb. Sonda ekspertlərin sualları cavablandırılıb.
Görüşdən sonra qonaqlar DİM-də yaradılmış və ölkəmizin milli qiymətləndirmə sisteminin tarixinə aid muzey və qəbul imtahanları ilə bağlı ölkə üzrə statistik məlumatları əks etdirən Azərbaycan Respublikasının elektron xəritəsi ilə tanış olublar.
Xatırladaq ki, Dövlət İmtahan Mərkəzinin Direktorlar Şurasının sədri Məleykə Abbaszadə “Yüksəliş” müsabiqəsinin Təşkilat Komitəsinin üzvüdür. Bundan əlavə, müsabiqə zamanı istifadə olunan müəyyən qiymətləndirmə alətləri DİM tərəfindən hazırlanır.