5–6 noyabr 2025-ci il tarixlərində Dövlət İmtahan Mərkəzinin İnformasiya texnologiyaları şöbəsinin müdiri Paşa Rzayev Koreya Respublikasının İnçon şəhərində İnformasiya və Kommunikasiya Texnologiyalarının (İKT) İnkişafı üzrə Asiya-Sakit Okean Təlim Mərkəzi (APCICT) tərəfindən təşkil olunan “İllik Rəqəmsal Liderlər Proqramı”nda iştirak edib.
Tədbir Koreya Respublikasının Elm və İKT Nazirliyi, İnçon Metropoliten Şəhəri və İnçon Turizm Təşkilatının dəstəyi ilə keçirilib. Proqramın məqsədi dövlət orqanlarında çalışan rəhbər şəxslərin, siyasətçilərin və mütəxəssislərin rəqəmsal idarəetmə və etibarlı süni intellekt sahəsində bilik və bacarıqlarını artırmaqdır.
Proqram çərçivəsində “Etibarlı süni intellektin prinsipləri”, “Rəqəmsal idarəetmə strategiyalarının hazırlanması və tətbiqi”, “Məlumat təhlükəsizliyi və kiberdayanıqlılıq”, “Açıq məlumat və vətəndaş iştirakı” kimi mövzularda təqdimatlar və təlim sessiyaları keçirilib.
P.Rzayev tədbirdə çıxış edərək DİM-in fəaliyyət istiqamətləri üzrə süni intellekt və rəqəmsal idarəetmənin dövlət xidmətlərinin effektivliyinin artırılması, şəffaflığın təmin olunması və vətəndaş yönümlü idarəetmənin gücləndirilməsindəki roluna dair görülən tədbirlər barədə məlumat verib.
