2022-ci il 24 iyun tarixində Şərq Tərəfdaşlığı (ŞT) Regional İdarəçilik İslahatı Fondu və GIZ (Almaniya Beynəlxalq Əməkdaşlıq Təşkilatı) Regional Fondunun birgə təşkilatçılığı ilə ŞT ölkələrinin iştirakı ilə Dövlət İdarəçilik İslahatı üzrə II “Peşəkar dövlət qulluğu və peşə təhsili və təlimi” (PTT) layihəsi ilə bağlı onlayn dəyirmi masa keçirilib.
Dəyirmi masa ŞT ölkələrinin dövlət qulluğunda peşəkar inkişaf sisteminə dair təcrübə mübadiləsi məqsədi daşıyıb. Tədbirdə ŞT ölkələrinin - Azərbaycan, Ermənistan, Gürcüstan, Moldova və Ukraynanın dövlət qurumları nümayəndələri öz ölkələrində peşəkar inkişaf imkanları barədə təqdimatlar ediblər.
Tədbirdə Dövlət İmtahan Mərkəzinin Strateji inkişaf şöbəsinin müdiri Vəli Hüseyn və Hüquqi təminat, dövlət qulluğu siyasəti və dövlət strategiyası ilə iş sektorunun müdiri Elnur Abbasov iştirak ediblər. V. Hüseyn “Azərbaycanda dövlət qulluqçuları üçün peşəkar inkişaf imkanları” adlı təqdimatla çıxış edərək ölkəmizdə “Azərbaycan Respublikasında dövlət qulluğunun inkişafına dair 2019−2025-ci illər üçün Strategiya”da əks olunan dövlət qulluqçularının fasiləsiz peşəkar inkişafının təmin edilməsi istiqaməti, DİM tərəfindən təşkil edilən təlimlər və sahə üzrə fəaliyyət, həmçinin Azərbaycan Respublikasının Prezidenti yanında Dövlət İdarəçilik Akademiyasının qeyd edilən istiqamət üzrə fəaliyyəti barədə tədbir iştirakçılarına məlumat verib.
Tədbirin sonunda Alman Dövlət Qulluqçuları Birliyinin nümayəndəsi Astrid Hollmann “Almaniyada dövlət qulluqçularının Maraq Nümayəndəliyi (vəkilliyi): inkişaf yolu və cari vəziyyət” adlı təqdimatla çıxış edib.