Dövlət İmtahan Mərkəzinin nümayəndə heyəti Təhsilin Qiymətləndirilməsi üzrə Beynəlxalq Assosiasiyanın Zambiyada keçirilən 50-ci illik konfransında iştirak edir.
21 – 26 sentyabr 2025-ci il tarixlərində Zambiyanın Livinqston şəhərində “Qiymətləndirmədə çeviklik: Təhsildə sürətli transformasiyalara uyğunlaşma” (“Assessment Agility: Navigating Rapid Educational Transformations”) mövzusunda Təhsilin Qiymətləndirilməsi üzrə Beynəlxalq Assosiasiyanın (IAEA) 50-ci illik konfransı keçirilir. Konfransda Dövlət İmtahan Mərkəzini (DİM) Rəqəmsal inkişaf, innovasiyalar və strateji layihələrin idarə edilməsi şöbəsinin müdiri Elmir Şirinov, Dövlət dili və xarici dillər üzrə şöbənin müdiri Könül Hacıyeva və Elektron imtahan, yoxlama və müsahibələrin texnoloji təminatı şöbəsinin müdiri Tural Dünyamalıyev təmsil edirlər.
Konfransın məqsədi təhsil mütəxəssislərini bir araya gətirərək qiymətləndirmə sahəsində müasir çağırışları müzakirə etmək, ölkələr arasında təcrübə mübadiləsi aparmaq və sürətlə dəyişən təhsil sisteminə uyğun qiymətləndirmə yanaşmalarını inkişaf etdirməkdir.
Konfransın ilk günü, 21 sentyabr tarixində “Qiymətləndirmədə süni intellekt” (“Artificial Intelligence in Assessment”), “Öyrənənlərin bacarıqlarının təxmin edilən dəyərlərlə qiymətləndirilməsi” (“Estimating Learner Abilities Using Plausible Values”), “Səriştə əsaslı qiymətləndirmə” (“Competency-Based Assessment”) mövzuları üzrə tədbir öncəsi təlimlər keçirilib. 22 sentyabrda isə konfransın rəsmi açılışı olub, tədbirin əsas istiqamətləri və məqsədləri təqdim edilib, iştirakçılar arasında tanışlıq üçün geniş imkanlar yaradılıb.
Qeyd edək ki, DİM (əvvəlki TQDK-nın fəaliyyəti də daxil olmaqla) 1999-cu ildən Təhsilin Qiymətləndirilməsi üzrə Beynəlxalq Assosiasiyasının institusional üzvüdür, 2007 və 2019-cu illərdə sözügedən konfransa ev sahibliyi edib.
