Dövlət İmtahan Mərkəzinin Göyçay regional bölməsinin əməkdaşları tərəfindən 10 yanvar tarixindən başlayan seminarlara Kürdəmir rayonunda 36 , Ucar rayonunda 39, Qobustan rayonunda 28, Şamaxı rayonunda 35, İsmayıllı rayonunda 38, Ağsu rayonunda 28, Göyçay rayonunda 29, Ağdaş rayonunda 25, Zərdab rayonunda 19 nəzarətçi-müəllim olmaqla 9 rayon üzrə 277 nəzarətçi-müəllim cəlb edilib.
Seminar‑məşğələlərdə nəzarətçilər imtahanların gedişi haqqında prosedur qaydaları ilə yanaşı ali təhsil müəssisələrinə qəbul imtahanlarının yeni modelinə uyğun olaraq istifadə olunacaq cavab vərəqlərinin doldurulması, eləcə də xarici dil fənni üzrə imtahanda “dinləyib-anlama” bacarıqlarının yoxlanılması üçün nəzərdə tutulan dinləmə qurğusundan istifadə edilməsi üsulu ilə tanış olublar. Nəzarətçilərin imtahan prosesi ilə əyani surətdə tanış olması məqsədilə imtahan texnologiyasına aid film nümayiş etdirilib.
Seminar iştirakçıları DİM tərəfindən keçiriləcək sınaq imtahanlarına cəlb olunacaqlar. Bu da onların seminarlarda əldə etdikləri nəzəri biliklərin təcrübədə tətbiqinə kömək göstərəcək. Sınaq imtahanlarında nəzarətçi kimi özünü doğruldan müəllimlər test imtahanlarına cəlb olunacaqlar.
Dövlət İmtahan Mərkəzinin Göyçay regional bölməsinin əməkdaşları tərəfindən cari ildə keçiriləcək müvafiq imtahanlarda buraxılış rejimində iştirak edəcək qadın müəllimlərlə seminar-məşğələlər keçirilmişdir. Seminarlarda imtahan verəcək şagirdlərin sayına uyğun olaraq Kürdəmirdən 10 nəfər, Ucardan 9 nəfər, İsmayıllıdan 9 nəfər, Şamaxıdan 8 nəfər, Qobustandan 5 nəfər, Ağsudan 7 nəfər, Zərdabdan 5 nəfər, Göyçaydan 10 nəfər, Ağdaşdan isə 10 nəfər olmaqla ümumilikdə 73 nəfər iştirak etmişdir. Seminar iştirakçılarına buraxılış rejimini aparmaq qaydaları ətraflı izah olunmuş, onların şəxsi anket məlumatları dəqiqləşdirilmişdir.