Dövlət İmtahan Mərkəzinin İdarə Heyətinin sədri Məleykə Abbaszadə Londona səfəri çərçivəsində iyunun 11-də Kembric Universiteti Nəşriyyat və Qiymətləndirmə Cambridge (University Press & Assessment) qurumu və Avropada Dil Qiymətləndirilməsi üzrə Assosiasiyanın (ALTE) Katibliyinin nümayəndələri ilə görüşlər keçirib.
Kembric Universiteti Nəşriyyatı və Qiymətləndirmə qurumu (https://www.cambridge.org) ilə görüşdə qiymətləndirmə sahəsində strateji prioritetlər, psixometriklər, təhsildə ölçmə və qiymətləndirmə üzrə mütəxəssislərin hazırlanması, süni intellekt əsaslı test tapşırıqlarının işlənilməsi və rəhbər heyət üçün peşəkar inkişaf proqramları müzakirə olunub. Həmçinin DİM-in riyaziyyat fənni üzrə imtahanlarının A-Level riyaziyyat kvalifikasiyası ilə müqayisəli təhlili və ingilis dili imtahanlarının qiymətləndirilməsi diqqət mərkəzində olub. Tərəflər əməkdaşlıq çərçivəsində texniki dəstək, institusional inkişaf və pilot layihələrin icrası imkanlarını nəzərdən keçiriblər.
ALTE Katibliyi (https://www.alte.org) ilə keçirilən görüşdə isə dil biliyinin qiymətləndirilməsi sahəsində əməkdaşlıq, Azərbaycan Dili üzrə Sertifikatlaşdırma İmtahanının təkmilləşdirilməsi və dövlət qulluğunda tətbiqi, bu imtahanlar üzrə “Q Mark” keyfiyyət nişanının əldə edilməsi imkanları və tələblərinin müzakirəsi aparılıb. Bundan əlavə, dil imtahanlarında tapşırıq hazırlama prosesinin rəqəmsallaşdırılması və beynəlxalq qiymətləndirmə meyarlarının tətbiqi müzakirə olunub. ALTE nümayəndələri təşkilatın fəaliyyət istiqamətləri və üzv qurumlarla əməkdaşlıq modelləri barədə də məlumat veriblər. Görüşdə gələcək əməkdaşlığın çərçivəsi, potensial tərəfdaşlıq istiqamətləri və növbəti addımlar üzrə ilkin razılıq əldə olunub.
