22 oktyabr 2025-ci il tarixində Qazaxıstanın paytaxtı Astana şəhərində Qazaxıstan Respublikasının Elm və Ali Təhsil Nazirliyinin nəzdində Milli Test Mərkəzinin təşkilatçılığı ilə “Təhsilin qiymətləndirilməsində aktual məsələlər: Müasir metodlar və ağıllı həllər” adlı beynəlxalq elmi-praktik konfrans keçirilib. Konfransda Dövlət İmtahan Mərkəzinin Rəqəmsal inkişaf, innovasiyalar və strateji layihələrin idarə edilməsi şöbəsinin müdiri Elmir Şirinov və Metodik təminat və təlimlər sektorunun müdiri Elmir Məmişov iştirak ediblər.
Tədbirdə Qazaxıstan Respublikasının Elm və Ali Təhsil Nazirliyi və Maarif Nazirliyinin rəhbərliyi, testologiya sahəsində dünyanın aparıcı şirkətləri, eləcə də müxtəlif ölkələrin imtahan mərkəzlərinin nümayəndələri, universitet rektorları, qiymətləndirmə sahəsində fəaliyyət göstərən alim və mütəxəssislər iştirak ediblər.
Tədbir Milli Test Mərkəzinin direktoru Bolatbek Abdirasilovun açılış nitqi ilə başlayıb və müxtəlif istiqamətlərdə sessiyalarla davam edib. Konfrans zamanı çıxış edən Qazaxıstan Respublikasının Elm və Ali Təhsil naziri Siyasət Nurbek konfransın əhəmiyyətini vurğulayaraq, onun qiymətləndirilmə sahəsində ideya və təcrübə mübadiləsi, eləcə də milli təhsil sisteminin təkmilləşdirilməsi üçün mühüm platforma olduğunu qeyd edib.
Konfrans çərçivəsində DİM-in sektor müdiri Elmir Məmişov “Azərbaycanda yüksək riskli imtahanların həyata keçirilməsi: Etibar və Şəffaflığın təmin edilməsi” (Administration of high-stakes exams in Azrbaijan: Ensuring Trust and Transparaency) adlı təqdimatla çıxış etmişdir. Təqdimat zamanı E.Məmişov ali təhsil müəssisələrinə qəbul imtahanlarından əvvəl aparılan maarifləndirmə işləri, tövsiyə, dəstək və metodik xarakterli materialların dərci, imtahanların şəffaf və etibarlı şəkildə keçirilməsi, onun bütövlüyünün təmini, imtahan nəticələrinin emalının dəqiqliyi, eləcə də şəffaflığın təmini üçün imtahan nəticələri ilə yanaşı iştirakçılara müvafiq imtahan sənədlərinin (cavab kartlarının və vərəqlərinin elektron surətləri, qiymətləndirmə meyarları və s.) təqdim edilməsi, apellyasiya müraciətlərinin qəbulu istiqamətində görülən işlərlə bağlı iştirakçıları məlumatlandırıb. O, həmçinin DİM tərəfindən həyata keçirilən elektron imtahanlar və Onlayn Marker Sisteminin tətbiqi, Test bankının idarəolunması, tam avtomatlaşmış çap sistemləri kimi DİM-in qiymətləndirmə proseslərinin rəqəmsallaşdırılması istiqamətində atdığı mühüm addımlar barədə məlumat verib.
Konfransın məqsədi bilik və bacarıqların qiymətləndirilməsi sahəsində fəaliyyət göstərən aparıcı təşkilatların və beynəlxalq şirkətlərin mütəxəssislərini bir araya gətirərək qabaqcıl ideya, təcrübə və nailiyyətlərin mübadiləsini təmin etmək olub. Tədbirin əsas mövzusu təhsilin keyfiyyətinin artırılması, süni intellekt və müasir texnologiyaların qiymətləndirilmə proseslərinə inteqrasiyası, həmçinin bu sahədə beynəlxalq əməkdaşlığın gücləndirilməsi olub.
DİM-in nümayəndə heyəti oktyabrın 23-də Milli Test Mərkəzini ziyarət edib. Ziyarət zamanı onlar elektron imtahanlara nəzarət üçün yaradılan situasiya mərkəzində olub və mərkəzin mütəxəssisləri ilə aktual məsələlər üzrə fikir və təcrübə mübadiləsi aparıblar.
