2022-ci il 8-10 iyun tarixlərində Regional Xab və Qazaxıstan İnsan Resursları Menecerləri Assosasiyasının birgə təşkilatçılığı ilə Qazaxıstanın Türküstan şəhərində özəl və dövlət sektoru təşkilatlarının səmərəliliyinin artırılmasında insan resurslarının idarə edilməsinin rolu və əhəmiyyəti ilə bağlı “İnsan Kapitalı Forum”u keçirilib.
Forum çərçivəsində Xab tərəfindən iştirakçı ölkələrin insan resurslarının idarə edilməsi sahəsində təcrübələrinin paylaşılması məqsədilə “Dövlət qulluğunda insan kapitalı” və “İnteqrasiya kodu, mədəniyyətlərarası aspekt” mövzusunda panel sessiyalar keçirilib.
ABŞ, Tacikistan, Türkiyə, Estoniya, Özbəkistan və Rusiyadan olan 300-ə yaxın nümayəndə forumda iştirak edib və müxtəlif mövzularda çıxışlar ediblər.
Azərbaycan Respublikası tədbirdə DİM-in Direktorlar Şurasının sədr müavini Bəhram Xəlilov ilə təmsil olunub. B.Xəlilov Azərbaycanın dövlət qulluğu sistemində insan kapitalının rolu və sahə üzrə yenilikləri barədə tədbir iştirakçılarına məlumat verib.
Qazaxıstana səfər zamanı DİM-in nümayəndələri Regional Xabın Rəhbər Komitəsinin sədri Əlixan Baymənov və Türkiyə Respublikası İnsan Resursları İdarəsinin şöbə müdiri Savaş Ceylan ilə də görüş keçirib, qurumlar arasında əməkdaşlağın hazırki vəziyyəti və gələcək perspektivləri barədə müzakirələr aparıblar.
Eyni zamanda 2022-ci il 7 iyun tarixində Qazaxıstanın Nur-Sultan şəhərində Nazarbayev Universitetinin Dövlət Siyasəti üzrə Ali Məktəbinin 2022-ci ilin “Dəyişən dünyada dövlət siyasəti və yaxşı idarəetmə” adlı konfransı (GSPPConf2022) çərçivəsində Dövlət Qulluğu üzrə Astana Regional Xab (Regional Xab) tərəfindən “İnsanlara əsaslanan idarəetməyə doğru: ölkələrin perspektivləri” mövzusunda panel sessiya təşkil edilib. Panel sessiyanın məqsədi siyasətin qurulması və xidmətlərin göstərilməsi üçün insan yönümlü yanaşmanın layihələndirilməsi və qurulması ilə bağlı perspektivlərin müzakirəsi olub.
Tədbirdə Azərbaycan, Qazağıstan, Qırğızıstan, ABŞ, Koreya və digər ölkələrin nümayəndələri öz ölkələrinin təcrübələrini bölüşüblər.
Panel sessiyada DİM-in Strateji inkişaf şöbəsinin böyük məsləhətçisi Səbinə Hüseynova “Dövlət xidmətlərinin göstərilməsi: Azərbaycan Respublikasının perspektivləri” adlı təqdimatla çıxış edərək DİM-in göstərdiyi xidmətlər və sahə üzrə ölkədə fəaliyyət göstərən aparıcı qurumlar barədə tədbir iştirakçılarına məlumat verilib və panel sessiyanın sonunda iştirakçıların sualları cavablandırıb.
