13 dekabr 2022-ci il tarixində Dövlət İmtahan Mərkəzi (DİM) və Azərbaycan Respublikası Mədəniyyət Nazirliyinin (Nazirlik) rəhbər şəxsləri arasında görüş keçirilib.
Görüşdə DİM-in Direktorlar Şurasının sədri Məleykə Abbaszadə, Azərbaycan Respublikasının mədəniyyət naziri Anar Kərimov, mədəniyyət nazirinin müavini Sevda Məmmədəliyeva, DİM-in Direktorlar Şurasının sədr müavini Bəhram Xəlilov, eləcə də DİM-in və Nazirliyin müvafiq struktur bölmələrinin rəhbər şəxsləri iştirak ediblər.
Anlaşma Memorandumunun imzalanmasının məqsədi tərəflər arasında qarşılıqlı iş birliyinin qurulması, mövcud münasibətlərin inkişaf etdirilməsi, o cümlədən Uşaq musiqi, incəsənət, rəssamlıq, muğam, aşıq məktəb və mərkəzlərinə müəllimlərin və direktorların işə qəbulu ilə bağlı əməkdaşlıq etməkdir. Görüş zamanı tərəflər potensial əməkdaşlıq istiqamətləri barədə müzakirə aparıblar.
Sonda isə Nazirlik tərəfindən DİM-in kitabxanasına Şuşanın və Azərbaycanın tarixini əks etdirən kitablar hədiyyə olunub.
Xatırladaq ki, görüşdən əvvəl iştirakçılar DİM-də yaradılmış və ölkəmizin milli qiymətləndirmə sisteminin tarixini əks etdirən muzey və qəbul imtahanları ilə bağlı ölkə üzrə statistik məlumatları əks etdirən Azərbaycan Respublikasının elektron xəritəsi ilə də tanış olublar.