8 noyabr 2019-cu il tarixdə Şirvan şəhəri 13№-li tam orta məktəbdə Azərbaycan dili, ingilis dili, kimya, coğrafiya, riyaziyyat və tarix fənlərindən buraxılış və qəbul imtahanlarında istifadə edilən müvafiq fənn kurikulumunun nəticələrinə uyğun qiymətləndirmə tapşırıqlarının hazırlanması və onların meyarlar əsasında yoxlanılmasına (marker) dair hazırlıq kursları keçirilib.
Hazırlıq kurslarında yalnız elektron qeydiyyatdan keçmiş, ixtisası müvafiq fənlərə uyğun müəllimlər, metodistlər iştirak ediblər.
Hazırlıq kurslarında Azərbaycan dili fənni üzrə DİM-in əməkdaşı Sevinc Hacıyeva, ingilis dili fənni üzrə moderator Nərminə Əliyeva, kimya fənni üzrə moderator Xəlil Nağıyev, coğrafiya fənni üzrə moderator Nərminə Seyfullayeva, riyaziyyat fənni üzrə DİM-in əməkdaşı Samir Hüseynli və tarix fənni üzrə moderator Hafiz Cabbarov müvafiq fənn kurikulumu və imtahanlarda mənimsənilmə səviyyəsinin yoxlanılması və qiymətləndirilməsi mümkün olan alt standartlar, onları reallaşdıran mövzular, qiymətləndirmə vasitələrinin formaları, məzmunu və qiymətləndirmə meyarlarının hazırlanması ilə bağlı təqdimatlar ediblər.
Hazırlıq kursunun proqramına əsasən iştirakçılarla praktiki mərhələ internet vasitəsi ilə həyata keçiriləcək.
Sonuncu mərhələdə kurs iştirakçıları kalibrləmə prosesindən keçiblər. İştirakçılara kurs keçdikləri barədə sertifikatlar veriləcək. Onların şəxsi məlumatları DİM-in elektron “Məlumat bazası”na daxil ediləcək.
