Hazırlıq kurslarında yalnız elektron qeydiyyatdan keçmiş, ixtisası müvafiq fənnə uyğun olan müəllimlər, metodistlər və pedaqoji profilli ali təhsil müəssisələrinin bakalavriat səviyyəsində həmin fənn üzrə təhsil alan sonuncu kurs tələbələri və magistrlər iştirak ediblər.
Hazırlıq kursları həm əyani, həm də onlayn formatda keçirilib.
15 aprel tarixində kimya, 16 aprel tarixində isə fizika fənni üzrə hazırlıq kurslarının ilk məşğələsi keçirilib. Hər iki fənn üzrə məşğələlərdə DİM-in şöbə müdiri Afiqə Batıyeva hazırlıq kursunun məqsədi və iş planı haqqında kurs iştirakçılarına məlumat verib.
Moderatorlar – kimya fənni üzrə Elşad Abdullayev, fizika fənni üzrə Əlövsət Rəcəbli müvafiq fənn kurikulumlarının mahiyyəti, məzmunu və strukturu ilə bağlı təqdimat ediblər.
17 aprel tarixində biologiya, tarix və riyaziyyat fənlərindən, 18 aprel tarixində isə coğrafiya və ingilis dili fənlərindən hazırlıq kurslarının ikinci məşğələsi keçirilib.
Moderatorlar – biologiya fənni üzrə Nailə Əliyeva, tarix fənni üzrə Hafiz Cabbarov, riyaziyyat fənni üzrə Aqşin Abdullayev, coğrafiya fənni üzrə Nərminə Seyfullayeva və ingilis dili fənni üzrə Nərminə Əliyeva ölkənin təhsil sistemində tətbiq olunan qiymətləndirmə formaları (Beynəlxalq və Milli qiymətləndirmə) və imtahanlarda istifadə edilən tapşırıqların tipləri haqqında təqdimatla çıxış ediblər.
Təqdimatlar ətrafında müzakirələr aparılıb. Kurs iştirakçılarını maraqlandıran suallar cavablandırılıb.
Hazırlıq kursları növbəti həftə davam etdiriləcəkdir.
