Kimya və fizika fənləri üzrə elmi-metodiki seminarlarda gündəlik məsələ 12 may 2019-cu il tarixində ali təhsil müəssisələrinə qəbul imtahanlarının ikinci mərhələsi – I və IV ixtisas qrupları üzrə imtahanda istifadə edilmiş tapşırıqların elmi-metodiki baxımdan təhlili olub.
Rus dili, tarix və coğrafiya fənləri üzrə seminarlarda müfaviq olaraq 19 may 2019-cu il tarixində ali təhsil müəssisələrinə qəbul imtahanlarının ikinci mərhələsi – III və II ixtisas qrupları üzrə imtahanda istifadə edilmiş tapşırıqlar təhlil edilib.
Biologiya fənni üzrə seminarda 23 iyun 2019-cu il tarixində ali təhsil müəssisələrinə qəbul imtahanlarının ikinci mərhələsi - IV ixtisas qrupu üzrə imtahanda istifadə edilmiş tapşırıqlar müzakirə edilib.
Hər bir tapşırığın imtahan nəticələrinin statistik göstəriciləri əsasında mövzu, mürəkkəblik dərəcəsi, fənn kurikulumunun təlim nəticələrinə uyğunluğu baxımından təhlili aparılıb. Təhlil göstərdi ki, tapşırıqlar abituriyentlərin bilik və bacarıqlarını obyektiv yoxlamağa və qiymətləndirməyə imkan verib. Həmçinin tapşırıqlar məzmun standartlarının tələblərinə uyğun olub.
Riyaziyyat fənni üzrə seminarda 7aprel 2019-cu il tarixdə tam orta (11 illik) təhsil səviyyəsi üzrə buraxılış imtahanında istifadə edilmiş tapşırıqların açıqlanmış bir variantının müzakirəsi olub.
Hər bir tapşırıq mövzu, həll qaydası və qiymətləndirmə meyarları baxımından təhlil edilib.
Seminarlarda Bakı, Sumqayıt şəhərlərinin və Abşeron rayonunun ümumtəhsil və ali təhsil müəssisələrinin müəllimləri, metodistlər və AMEA-nın müvafiq sahələr üzrə mütəxəssisləri iştirak ediblər.
Müzakirələr zamanı bildirilmiş redaktə xarakterli qeyd və təkliflər bankın təkmilləşdirilməsində nəzərə alınacaq. Həmçinin abituriyentlərin cavab verməkdə çətinlik çəkdikləri tapşırıqların izahlarına dair metodiki tövsiyə hazırlanacaq və “Abituriyent” jurnalının 2-ci sayında dərc olunacaq.
Növbəti seminarlarda müzakirələr davam etdiriləcək.
