Dövlət İmtahan Mərkəzində 16 oktyabr 2024-cü il tarixindən Azərbaycan dili, riyaziyyat, informatika, kimya, fizika, biologiya, coğrafiya, tarix, ingilis dili və rus dili fənləri üzrə buraxılış və qəbul imtahanlarında istifadə edilən qiymətləndirmə materiallarının işlənməsi, ekspertizası və yoxlanılması ilə bağlı müəllif, ekspert və marker hazırlığı kursları (yeni qruplar üçün) fəaliyyətə başlayır. Hazırlıq kursları Bakı şəhəri üzrə qeydiyyatdan keçənlər üçün əyani, regionlardan olan iştirakçılar üçün onlayn keçiriləcək. Hər fənn üzrə kursun müddəti 2 aydır.
Hazırlıq kurslarında yalnız elektron qeydiyyatdan keçmiş müəllimlər, metodistlər və pedaqoji yönümlü ali təhsil müəssisələrinin bakalavriat səviyyəsinin müvafiq fənn üzrə təhsilalan axırıncı kurs tələbələri və həmin müəssisələrdə təhsilalan magistrlər iştirak edəcəklər.
Kursun sonunda iştirakçılar müvafiq fənlər üzrə yoxlama imtahanından və kalibrləmə prosesindən (cavabı yazı ilə ifadə olunan tapşırıqların kompüterdə xüsusi proqram vasitəsilə yoxlanılması) keçəcəklər. Həm yoxlama imtahanından, həm də kalibrləmə prosesindən müvəffəqiyyətlə keçənlərin şəxsi məlumatları Mərkəzin elektron “Məlumat bazası”na daxil ediləcək və onlara sertifikat veriləcək.