9 iyun 2023-cü il tarixində Bakı şəhəri Suraxanı rayonu Bülbülə qəsəbəsində yerləşən 327 nömrəli məktəbdə Dövlət İmtahan Mərkəzinin Direktorlar Şurasının sədri Məleykə Abbaszadə ilə məktəbin ümumi (9 illik) və tam (11 illik) orta təhsil səviyyəsi üzrə bu il məzun olan şagirdləri arasında görüş keçirilib.
Görüşdə Suraxanı Rayon İcra Hakimiyyətinin başçısı Əziz Əzizov, Bakı Şəhəri üzrə Təhsil İdarəsinin sektor müdiri Anar Mustafazadə və məktəbin şagird – müəllim kollektivi iştirak edib.
Görüşdən əvvəl Məleykə Abbaszadə Elm və Təhsil Nazirliyinin Təhsil Televiziyasında yayımlanan “İmtahan” layihəsində sual müəllifləri içərisində qalib seçilən məktəbin 7-ci sinif şagirdi Nəzrin Sadıqlıya öz hədiyyəsini təqdim edib. M.Abbaszadə həmçinin məktəbin kitabxanasına da Dövlət İmtahan Mərkəzinin nəşr etdiyi 55 adda siniflər üzrə qiymətləndirmə tapşırıqları və test topluları hədiyyə edib.
Daha sonra məktəb şagirdlərinin hazırladığı rəsm sərgisinə baxış keçirilib.
Görüş şagirdlərin ümummilli lider Heydər Əliyevin 100 illiyi əlaqədar hazırladığı videoçarxın nümayiş etdirilməsi ilə başlanıb.
Görüşdə sədr M.Abbaszadə məktəbin 9-cu və 11-ci sinif şagirdlərinin buraxılış imtahanındakı göstəriciləri – orta bal, fənlər üzrə ayrıca orta ballar, məzunların sayı, ən yüksək bal toplayan şagirdlər və s. haqqında məlumat verib.
M.Abbaszadə həmçinin abituriyentlərin qarşıya qoymalı olduqları hədəflər, bilik və bacarıqların formalaşmasında rol oynayan amillər, ixtisas seçimi, Dövlət İmtahan Mərkəzinin onlar üçün faydalı ola biləcək nəşrləri və digər məsələlər haqqında danışıb.
Görüşün sonunda M.Abbaszadə buraxılış imtahanları, imtahan tarixləri, imtahanın məzmunu, apellyasiya komissiyalarının fəaliyyəti, qəbul qaydaları, məktəb kurikulumu və təhsil sistemi haqqında şagirdlərin açıq suallarını cavablandırıb.
