7 iyun 2023-cü il tarixində Seul şəhərində Azərbaycan və Cənubi Koreya arasında iqtisadi əməkdaşlıq üzrə birgə hökumətlərarası komissiyanın 3-cü iclası keçirilib.
İclasda Koreya nümayəndə heyətinin rəhbəri, ticarət, sənaye və energetika nazirinin müavini Jeong Dae-jin ötən il Azərbaycan və Cənubi Koreya arasında diplomatik əlaqələrin qurulmasının 30 illiyinin qeyd edildiyini xatırladıb. Jeong Dae-jin Azərbaycan və Cənubi Koreyanın güclü mədəni və iqtisadi əlaqələrə malik dost ölkələr olduğunu bildirib və əlaqələri daha da genişləndirmək üçün ciddi potensialın mövcudluğunu vurğulayıb.
Azərbaycan nümayəndə heyətinin rəhbəri, rəqəmsal inkişaf və nəqliyyat nazirinin müavini Samir Məmmədov Azərbaycanın Cənubi Qafqaz regionunda Koreyanın ən böyük ticarət tərəfdaşı olduğunu qeyd edib və ölkəmizin ötənilki makroiqtisadi göstəriciləri, iki ölkə arasındakı ticarət dövriyyəsinin həcmi barədə məlumat verib.
Daha sonra görüş ticarət, investisiyalar, informasiya texnologiyaları, energetika, kənd təsərrüfatı, təhsil, mədəniyyət, səhiyyə, turizm və s. sahələrin səlahiyyətli nümayəndələrinin qarşılıqlı məruzələri ilə davam edib. Çıxışçılar öz sahələrində qarşılıqlı əməkdaşlıq üçün mövcud imkanları diqqətə çatdıraraq gələcək birgə fəaliyyətin mümkün istiqamətlərini müəyyənləşdiriblər.
Görüşdən sonra müxtəlif Koreya şirkətlərinin təmsilçilərinin iştirakı ilə biznes-forum keçirilib.
İyunun 9-da isə Azərbaycan nümayəndə heyətinin tərkibində Cənubi Koreyaya səfər edən Dövlət İmtahan Mərkəzinin Texnoloji nəzarət və imtahan materiallarının avtomatlaşdırılmış çapı şöbəsinin müdiri Tural Mustafayev Jincheon (Cinçan) şəhərində Koreya Kurikulum və Qiymətləndirmə İnstitutunun (KICE) birinci vitse-prezidenti xanım Jimin Chonun rəhbərlik etdiyi nümayəndə heyəti ilə görüşüb. T.Mustafayev görüşdə DİM-in tarixi və cari fəaliyyəti haqqında ətraflı məlumat verib və qarşı tərəfi maraqlandıran sualları cavablandırıb. DİM-in gələcək planları haqqında danışan şöbə müdiri kompüterləşdirilmiş imtahanların təşviqi, imtahanların hazırlanması, keçirilməsi və qiymətləndirilməsi sahəsində süni intellekt əsaslı texnologiyaların tətbiqi kimi məsələlərin Dövlət İmtahan Mərkəzinin Direktorlar Şurasının sədri Məleykə Abbaszadə tərəfindən prioritet istiqamətlər kimi müəyyən edildiyini diqqətə çatdırıb.
Koreya tərəfi də öz institutlarının dövlət tərəfindən maliyyələşdirilən elmi-tədqiqat institutu olduğunu, DİM kimi cəmiyyətdə yüksək nüfuza və güclü beynəlxalq əlaqələrə malik olduqlarını bildirib. Koreya Kurikulum və Qiymətləndirmə İnstitutunun fəaliyyəti haqqında geniş məlumat verən Jimin Cho hər iki təşkilatın gələcək planlarının oxşarlığını, Azərbaycan və Koreya arasında bu sahədə sıx əməkdaşlıq üçün geniş imkanlar olduğunu, ən yaxın zamanda heyətlərin qarşılıqlı ziyarətlərlə əməkdaşlıq sahələrini müəyyənləşdirib birgə fəaliyyətə başlamalarının vacibliyini vurğulayıb.