7 noyabr 2024-cü il tarixində Dövlət İmtahan Mərkəzinin rəhbərliyi 44 günlük Vətən müharibəsində iştirak edən DİM əməkdaşları ilə görüşüb.
Dövlət İmtahan Mərkəzinin regional bölmələrində çalışan əməkdaşlar görüşə onlayn qoşulub.
Görüşün əvvəlində Vətən müharibəsi şəhidlərinin əziz xatirəsi bir dəqiqəlik sükutla yad edilib.
Dövlət İmtahan Mərkəzinin İdarə Heyətinin sədri Məleykə Abbaszadə qeyd edib ki, ikinci Qarabağ müharibəsində əldə edilən möhtəşəm zəfər xalqımızın qürur mənbəyinə çevrilib. Bu tarixi qələbəni bizə yaşadan Ali Baş Komandan cənab Prezident İlham Əliyevə, şəhidlərimizə, qazilərimizə, əsgər və zabitlərimizə, rəşadətli Azərbaycan ordusuna minnətdarıq. Sədr qəhrəman əsgər və zabitlərlə bütün Azərbaycanın fəxr etdiyini, Dövlət İmtahan Mərkəzinin döyüşlərdə xüsusi fərqlənən bir qrup əməkdaşının Azərbaycan Respublikası Prezidentinin müvafiq Sərəncamları ilə medallarla təltif olunduğunu diqqətə çatdırıb.
Görüşdə əməkdaşlar çıxış edərək müharibə haqqında xatirələrini bölüşüb, qazi ailələrinə göstərilən diqqət və qayğıya görə minnətdarlıq ifadə ediblər.
Görüşün sonunda sədr əməkdaşlara birdəfəlik pul mükafatının ayrılması haqqında məlumat verib və onlara gələcək fəaliyyətlərində uğurlar arzulayıb.
Vətən müharibəsində iştirak edən DİM əməkdaşlarının siyahı və təltif olunduqları medallar:
1. Bədəlov Məhərrəm Əbülfət oğlu, baş leytenant, “Füzulinin azad olunmasına görə” medalı ilə təltif edilib.
2. Rzayev İmaməli Əli oğlu, baş leytenant, “Suqovuşanın azad olunmasına görə” medalı ilə təltif edilib.
3. İsmayılov Rafiq İsmayıl oğlu, "Cəsur döyüşçü", "Füzulinin azad olunmasına görə", "Şuşanın azad olunmasına" görə medalları ilə təltif olunub.
4. Talıbov Mahir Tahiroviç, "Füzulinin azad olunmasına görə", "Cəbrayılın azad olunmasına görə" medalları ilə təltif olunub.
5. Hüseynzadə Fuad Yaşar oğlu, "Kəlbəcərin azad olunmasına görə" medalı ilə təltif olunub.
6. Səfərov Kamran Hikmət oğlu, “Vətən müharibəsi iştirakçısı” medalı ilə təltif olunub.
7. Eminli Qədir Fərhad oğlu, “Vətən müharibəsi iştirakçısı” medalı ilə təltif olunub.
Dövlət İmtahan Mərkəzi adından 8 Noyabr Zəfər Günü münasibətilə Azərbaycan xalqını təbrik edir, bu zəfəri bizə qazandıran şəhidlərimizi hörmətlə anır, qazilərimizə cansağlığı arzulayırıq.
Zəfərin mübarək, Azərbaycan!
