5–8 noyabr 2025-ci il tarixlərində Niderland Krallığında Təhsilin Qiymətləndirilməsi üzrə Avropa Assosiasiyasın (Association for Educational Assessment – Europe, AEA-Europe) 26-cı illik konfransı keçirilib. Konfransda Dövlət İmtahan Mərkəzini (DİM) Test bankı şöbəsinin müdiri Rəhman Mehralıyev, Strateji araşdırmalar və layihələrlə iş sektorunun müdiri Nərmin Abdurəhmanova və Statistik araşdırmalar və elmi layihələşdirmə şöbəsinin aparıcı məsləhətçisi Şükufə Mirzəyeva təmsil ediblər.
Konfrans “Gələcəyin qiymətləndirmə mühitinin formalaşmasının öyrənməyə müsbət təsiri” mövzusuna həsr olunub və təhsilin qiymətləndirilməsi sahəsində beynəlxalq təcrübənin bölüşdürülməsi, yeni yanaşmaların müzakirəsi, elmi məqalələrin təqdimatı, həmçinin qlobal tərəfdaşlıqların gücləndirilməsi baxımından xüsusi əhəmiyyət kəsb edib.
Konfransın ilk günündə müxtəlif vörkşoplar keçirilib. Bu sessiyalarda qiymətləndirmə sistemlərində innovativ yanaşmalar, rəqəmsal texnologiyaların tətbiqi, həmçinin süni intellektin qiymətləndirmə prosesinə inteqrasiyası kimi aktual mövzular müzakirə olunub.
Sonrakı günlərdə təhsilin qiymətləndirilməsi üzrə elmi məqalələrin təqdimatı olub, müxtəlif ölkələrdən olan mütəxəssislər öz tədqiqat nəticələrini təqdim edərək qiymətləndirmə siyasətləri, metodologiyaları və tətbiq təcrübələri üzrə fikir mübadiləsi aparıblar. Həmçinin diskussiya qrupları çərçivəsində beynəlxalq əməkdaşlığın gücləndirilməsi, qiymətləndirmədə keyfiyyət təminatı və innovativ qiymətləndirmə modellərinin tətbiqi kimi məsələlər ətrafında müzakirələr aparılıb.
Konfrans çərçivəsində N.Abdurahmanova “Kütləvi imtahanlarda açıq tipli tapşırıqlardan istifadənin effektivliyi”, Ş.Mirzəyeva isə “Buraxılış imtahanlarında müxtəlif tapşırıq növlərinin abituriyentlərin nəticələrinə təsiri” mövzularında elmi məqalələrini təqdim edərək DİM-in bu sahədəki təcrübəsini konfrans iştirakçılarının diqqətinə çatdırıblar.
Konfransın sonunda yekun mülahizələr təqdim edilmiş, iştirakçılar gələcək əməkdaşlıq istiqamətləri və təhsil qiymətləndirilməsində qlobal trendlərin tətbiqi üzrə tövsiyələr ediblər.
