11 avqust 2026-cı il tarixində Dövlət İmtahan Mərkəzində İtaliyanın SSML ICOTEA – HUB4Minds təşkilatının Prezidenti Prof. Tommaso Barone ilə görüş keçirilib.
DİM-in İdarə Heyətinin sədri Məleykə Abbaszadənin iştirakı ilə keçirilən görüşdə qiymətləndirmə və sertifikatlaşdırma sahəsində əməkdaşlıq imkanları, peşəkar və linqvistik bacarıqların qiymətləndirilməsi, müasir texnologiyaların tətbiqi və beynəlxalq təcrübənin öyrənilməsi məsələləri müzakirə olunub.
Görüş zamanı SSML ICOTEA – HUB4Minds təşkilatının peşəkar hazırlıq, təlim və sertifikatlaşdırma sahəsində fəaliyyəti barədə məlumat verilib. Qeyd olunub ki, təşkilat müxtəlif peşə istiqamətləri üzrə təlim və kurslar təşkil edir, iştirakçıların əldə etdikləri bilik və bacarıqları imtahanlar vasitəsilə qiymətləndirir və beynəlxalq sertifikatlar təqdim edir. Təşkilatın təqdim etdiyi sertifikatların İtaliyada və Avropa İttifaqına üzv ölkələrdə tanınması, eləcə də müvafiq peşə istiqamətlərində fəaliyyət göstərmək üçün istifadə olunması əməkdaşlıq baxımından xüsusi əhəmiyyət daşıyır.
Tərəflər bu təcrübənin Azərbaycanda tətbiqi, müxtəlif peşə və bacarıqlar üzrə təlim–imtahan–sertifikatlaşdırma modelinin inkişaf etdirilməsi və beynəlxalq standartlara uyğun qiymətləndirmə mexanizmlərinin yaradılması imkanları ətrafında fikir mübadiləsi aparıb. Eyni zamanda, müasir texnoloji həllərdən istifadə etməklə qiymətləndirmə və sertifikatlaşdırma proseslərinin daha çevik, şəffaf və effektiv təşkil edilməsinin, eləcə də peşəkar bacarıqların obyektiv qiymətləndirilməsinin vacibliyi vurğulanıb.
Görüş çərçivəsində DİM və SSML ICOTEA – HUB4Minds arasında gələcək əməkdaşlığın əsas istiqamətləri, o cümlədən bacarıqların qiymətləndirilməsi, beynəlxalq səviyyədə tanınan sertifikatlaşdırma mexanizmlərinin tətbiqi, qiymətləndirmə alətlərinin və texnoloji platformaların inteqrasiyası, habelə təcrübə və ekspert mübadiləsi imkanları nəzərdən keçirilib.
