Seminarın gündəlik məsələləri:
1. Dövlət İmtahan Mərkəzinin həyata keçirdiyi yeni layihələr və nəşr işləri barədə təqdimat;
2. Seminarın iş planının müzakirəsi və təsdiqi;
3. Ali təhsil müəssisələrinə və hərbi liseylərə qəbul imtahanları proqramının müzakirəsi olub.
Seminarlarda Bakı, Sumqayıt şəhərlərinin, Abşeron rayonunun ümumtəhsil və ali təhsil müəssisələrinin müəllimləri, metodistlər, AMEA-nın müvafiq sahə üzrə mütəxəssisləri iştirak ediblər.
DİM-in şöbə müdiri A.Batıyeva yeni dərs ilinə Mərkəz tərəfindən təqdim edilən yeni layihələr və nəşr işləri barədə təqdimatla çıxış etdi. Fənlər üzrə DİM-in Youtube kanalında yerləşdirilmiş vizual dərslər haqqında məlumat verdi, kimya fənnindən bir dərsi nümayiş etdirdi. Dərsliklərin tədris vahidləri və mövzuları əsasında onlayn sınaq variantlarının hazırlanması haqqında geniş məlumat verərək, otk.az saytında yerləşdirilmiş hər bir layihə üzrə bir variant təqdim etdi. Bu layihələr şagirdlərin müstəqil olaraq qəbul imtahanına hazırlaşmalarına yönəlib. A.Batıyeva həmçinin dərsliklər əsasında siniflər üzrə hazırlanmış qiymətləndirmə tapşırıqları kitabçalarının tamamilə fənn kurikulumunda nəzərdə tutulmuş təlim nəticələrinə uyğun olduğunu qeyd etdi. Bildirdi ki, 7-11-ci siniflər üzrə kitabçalar nəşr edilib.
Qeyd etdi ki, DİM-də görülən işlər, təqdim edilən layihələr beynəlxalq standartlara tam uyğundur. Bunu 22-27 sentyabr tarixində DİM-in təşkilatçılığı ilə Bakı şəhərində keçirilmiş Təhsilin Qiymətləndirilməsi üzrə Beynəlxalq Assosiasiyanın (IAEA) “Qiymətləndirmə və qərarvermə: fərdi və institusional həll yolları” mövzusunda 45-ci illik konfransının iştirakçıları da təsdiq ediblər.
Həmçinin o bildirdi ki, ümumtəhsil müəssisələrində istifadədə olan dərsliklərin monitorinqi aparılır, dərsliklərdəki materialların kurikulumlara uyğunluğu yoxlanılır, səhvlər, mübahisəli məqamlar varsa, dəqiqləşdirilir və rəylər hazırlanır. Qəbul proqramları, tapşırıq nümunələri və qiymətləndirmə meyarları hazırlanarkən monitorinq rəyləri nəzərə alınır. İmtahanın məzmunu ilə bağlı materiallar, yəni qəbul proqramı, tapşırıq nümunələri və qiymətləndirmə meyarları “Abituriyent” jurnalınının birinci sayında dərc edilir.
Sonra kimya fənni üzrə seminarın rəhbəri k.e.n. V.Əliyev iştirakçıları seminarın iş planı ilə tanış etdi. İş planı müzakirə edilərək təsdiq olundu. Daha sonra isə ali təhsil müəssisələrinə və hərbi liseylərə qəbul imtahanı proqramının ilkin müzakirəsi oldu.
Seminar iştirakçıları gündəlik məsələlər barədə fikir və təkliflərini bildirdilər.
Növbəti seminarda (22 oktyabr 2019-cu il tarixdə, saat 10:30-da; Ünvan: Abdulvahab Salamzadə küçəsi 28, keçmiş Bakı Asiya Universitetinin binası, 4-cü mərtəbə, akt zalı) ali təhsil müəssisələrinə və hərbi liseylərə qəbul imtahanı proqramının müzakirəsi davam etdiriləcək.
