2022-ci il 3 noyabr tarixində Mədəniyyət Nazirliyi ilə Dövlət İmtahan Mərkəzi arasında mövcud əməkdaşlıq çərçivəsində “Münaqişələrin idarə edilməsi” mövzusunda təlimin ikinci hissəsi təşkil olunub. Təlimə Mədəniyyət Nazirliyinin 14 əməkdaşı cəlb olunub.
Təlim Psixoloji iş və maarifləndirmə sektorunun müdiri Xavər Dadaşova və əməkdaşı Gülü Həsənova tərəfindən keçirilib. Təlim zamanı münaqişədə ünsiyyət stilləri, şiddətsiz ünsiyyət, aktiv və passiv dinləmə haqqında məlumat verilmiş, aktiv dinləmə mövzusunda psixoloji treninq təşkil olunub. Təlim zamanı iştirakçıların sualları cavablandırılmış, münaqişələrin müsbət və mənfi cəhətləri haqqında kollaj əsaslı müzakirə təşkil olunub.
Qeyd edək ki, dövlət qurumlarının, özəl sektorun və vətəndaşların müraciətləri əsasında bu və digər mövzularda təlimlərin təşkil olunması davam etdiriləcəkdir.
Təlimlərdə iştirak etmək istəyən şəxslər r.cahangirbayli@dim.gov.az elektron poçt ünvanına yaza və ya (012) 310 53 16 (daxili 1221) nömrəsinə zəng edə bilərlər.
