Seminarlarda gündəlik məsələ ali təhsil müəssisələrinə qəbul imtahanı proqramlarının müzakirəsi olub.
Seminarlarda orta ümumtəhsil və ali təhsil müəssisələrinin müəllimləri, metodistlər və AMEA-nın müvafiq fənlər üzrə mütəxəssisləri iştirak ediblər. Eyni zamanda DİM-in regional bölmələri (Naxçıvan, Gəncə, Şirvan, Lənkəran, Şəki, Bərdə, Xaçmaz, Şəmkir, Göyçay) ilə onlayn bağlantı vasitəsilə oradakı müəllimlər də müzakirələrə qoşulublar.
İclasın moderatoru, Metodika və dərsliklərin monitorinqi şöbəsinin əməkdaşı Fatimə Məmmədova seminar iştirakçılarını salamlayıb və qeyd edib ki, bu il Zəfərimizin beşinci ilidir. F.Məmmədova Zəfərin qazanılmasında əvəzsiz xidmətləri olan Ali Baş Komandana və Müzəffər ordumuza təşəkkür edib, şəhidlərimizə rəhmət diləyib və qazilərimizə cansağlığı arzulayıb.
Daha sonra Azərbaycan Respublikasının ərazi bütövlüyü uğrunda canlarını fəda etmiş şəhidlərin xatirəsi bir dəqiqəlik sükutla yad edilib.
Sonra Metodika və dərsliklərin monitorinqi şöbəsinin müdiri Afiqə Batıyeva seminarların iş planı ilə bağlı çıxış edərək aparılacaq müzakirələrlə iştirakçıları tanış edib. O, buraxılış və qəbul imtahanları proqramlarının hələ sentyabr ayından DİM-in saytında yerləşdirildiyini onların nəzərinə çatdırıb. Proqramlar hazırlanarkən müvafiq fənn kurikulumlarının təlim nəticələrinin və altstandartların tələblərinin nəzərə alındığını və əsas ədəbiyyat siyahısında yalnız dərsliklərin göstərildiyini qeyd edib.
Biologiya fənni üzrə seminarın rəhbəri biologiya elmləri namizədi Tariyel Eybatov, tarix fənni üzrə isə tarix üzrə fəlsəfə doktoru Mehman Abdullayev müvafiq fənn proqramlarının mahiyyəti və məzmunu haqqında geniş məlumat veriblər. Seminarlarda biologiya fənni üzrə ekspert Vahid Balabəyov və DİM-in Humanitar fənlər üzrə sektorunun müdiri Royal Qulusoy seminar iştirakçılarının əsas və əlavə ədəbiyyat sıyahıları haqqında suallarını cavablandırıblar.
Növbəti həftə müzakirələr davam etdiriləcək.
