Dövlət İmtahan Mərkəzi, Elm və Təhsil Nazirliyi və Təhsil İnstitutunun birgə əməkdaşlığı çərçivəsində Niderland Krallığının “CİTO – Niderland Milli Təhsil İnsitutu”nun dəstəyi ilə həyata keçirilən layihənin riyaziyyat fənni istiqamətində təlimləri yekunlaşıb.
Qeyd edək ki, hər biri 2 saat olmaqla 11 günü əhatə edən təlimlər onlayn şəkildə riyaziyyat fənni istiqamətində seminar və praktiki məşğələlərin keçirilməsi üzrə beynəlxalq təcrübəsi olan Sjoerd Crans tərəfindən keçirilib. Təlimlərdə DİM-in nümayəndələri, riyaziyyat fənni istiqamətində buraxılış və qəbul imtahanlarında tapşırıqların tərtib olunması və ekspertizası üzrə DİM ilə əməkdaşlıq edən ekspertlər, Elm və Təhsil Nazirliyinin nümayəndələri, Təhsil İnsitutunun nümayəndə heyəti və riyaziyyatçılar iştirak ediblər. 24 ekspert və 6 əməkdaşdan ibarət təlim iştirakçıları hər birində 12 nəfər olmaqla 2 qrup şəklində bölünərək verilən tapşırıqlar üzərində işləyiblər.
Layihə aşağıdakı məsələləri əhatə edib:
-
Situasiya tipli test tapşırıqlarının hazırlanması və quruluşuna dair ümumi nəzəriyyə;
-
Spesifikasiyalara əsaslanan test tapşırıqlarının tərtibinə dair tapşırıqlar;
-
PISA 2021 çərçivə sənədində riyazi savadlılıq və funksional savadlılığın qiymətləndirilməsi;
-
Savadlılığın qiymətləndirilməsindəki kontekstlər: nəzəriyyə və təcrübə; Azərbaycandan və Hollandiyadan nümunələr;
-
Bacarıq yönümlü (competency based) qapalı test tapşırıqlarının tərtibinə dair tapşırıqlar;
-
Açıq sualların tərtib olunması.
Cito ekspertləri tərəfindən təbiət elmləri istiqaməti üzrə təlimlərin 24 oktyabr tarixindən keçirilməsi planlaşdırılıb.
Qeyd edək ki, Cito ilə DİM arasında əməkdaşlığa DİM-in sələfi olan Tələbə Qəbulu üzrə Dövlət Komissiyasının fəaliyyəti dövründən başlanılıb. 12 iyul 2021-ci il tarixində DİM və Cito arasında təhsildə qiymətləndirmə sahəsində institusional inkişafın artırılması istiqamətində əməkdaşlığın genişləndirilməsi məqsədilə Anlaşma Memorandumu imzalanıb
