Dövlət İmtahan Mərkəzində (DİM) keçirilən Kembric İngilis dili üzrə “B1 Preliminary” və “B1 Preliminary for Schools” imtahanlarında iştirak etmiş namizədlərə beynəlxalq sertifikatların təqdimetmə mərasimi keçirilib.
5 avqust 2026-cı il tarixində Xaçmaz şəhərində keçirilən tədbirdə orada fəaliyyət göstərən Kembricin hazırlıq mərkəzi – “Education House”un tələbələri və onların valideynləri iştirak ediblər.
Mərasimdə çıxış edən DİM-in əməkdaşı Elnarə Tağıyeva Kembric İngilis dili kvalifikasiyalarının şagirdlərin dil biliklərinin beynəlxalq səviyyədə qiymətləndirilməsində əhəmiyyətini vurğulayıb. O, uşaqların erkən yaşlardan beynəlxalq imtahanlarda iştirakının onların həm dil bacarıqlarının inkişafına, həm də gələcək təhsil imkanlarına mühüm töhfə verdiyini qeyd edib.
Tədbir zamanı valideynlər də öz təcrübələrini bölüşərək övladlarının imtahana hazırlıq prosesi haqqında danışıblar. Onlar beynəlxalq sertifikatların təqdim olunma mərasiminin uşaqlar üçün xüsusi motivasiya yaratdığını və əldə etdikləri nəticənin onların özünəinamına müsbət təsir göstərdiyini bildiriblər.
Qeyd edək ki, DİM Cambridge Assessment Englishin Azərbaycandakı rəsmi test mərkəzlərindən biri olaraq müxtəlif səviyyələr üzrə Kembric İngilis dili kvalifikasiyaları, o cümlədən Cambridge English Assessment və Cambridge English Teaching imtahanlarını təqdim edir.
Kembric İngilis dili kvalifikasiyaları və imtahanların keçirilməsi ilə bağlı ətraflı məlumatı DİM-in rəsmi resurslarında əldə etmək mümkündür.
