2022-ci il 5-7 sentyabr tarixlərində Koreya Respublikasının İnçxon şəhərində Birləşmiş Millətlər Təşkilatının Asiya və Sakit Okean üzrə İqtisadi və Sosial Komissiyasının (UNESCAP) Asiya və Sakit Okean üzrə İnformasiya və Kommunikasiya Texnologiyalarının İnkişafı Təlim Mərkəzinin (APCICT) və Koreya Respublikasının Elm və İKT Nazirliyinin birgə təşkilatçılığı ilə “Davamlı inkişaf naminə qabaqcıl İKT istiqamətləri” adlı təlim proqramının təqdimatı keçirilib. Tədbirdə Dövlət İmtahan Mərkəzinin Strateji inkişaf şöbəsinin müdiri Vəli Hüseyn də iştirak edib.
Proqramın təqdimatı UNESCAP-ın icra katibinin müavini Kaveh Zahedi və Koreya Respublikası Elm və İKT Nazirliyinin Beynəlxalq Əməkdaşlıq Bürosunun baş direktoru Seong Gyu Kimin giriş sözləri ilə açılıb. Daha sonra tədbir “Qabaqcıl İKT istiqamətlərinə giriş”, “Süni intellekt”, “Blokçeyn” və “Əşyaların interneti” adlı sessiyalar ilə davam edib.
Proqram çərçivəsində aşağıdakı mövzulara dair təqdimatlar nümayiş etdirilib:
- Qabaqcıl İKT istiqamətlərinin izahı, əhatə dairəsi və xüsusiyyətləri;
- Davamlı inkişaf məqsədlərinə nail olmaqda qabaqcıl İKT istiqamətlərinin rolu və əhəmiyyəti;
- Qabaqcıl İKT istiqamətlərinə dair fəaliyyətin hazırlanması və tətbiqi zamanı nəzərə alınmalı olan əsas çətinliklər, maneələr və risklər;
- Dövlət sektorunda tətbiq olunan üç əsas texnologiya və qlobal məsələlərin hər biri ilə bağlı siyasətin cari vəziyyəti;
- Qabaqcıl İKT istiqamətlərinin effektiv və səmərəli inkişafı və tətbiqi üçün siyasət üzrə tövsiyələr və beynəlxalq əməkdaşlıq imkanları.
Təlim proqramı Koreya Ali Elm və Texnologiya İnstitutunun - Korean Institute of Science and Technology (KAIST) professoru Suk Kyonq Kim və İnstitutunun doktorantura tələbəsi Rəşad Əliyev tərəfindən keçirilib.
DİM və APCICT arasında olan əməkdaşlığın nəticəsi olaraq Hökumət Rəhbərləri üçün İKT-nin Əsasları Akademiyasının Modulları seriyasından 5 modul (İKT və hərtərfli inkişaf arasında əlaqə; e-Hökumətin tətbiqi; İnternet idarəçiliyi; İnformasiya təhlükəsizliyi və toxunulmazlıq; Nəzəriyyədə və təcrübədə İKT layihələrinin idarə olunması) Azərbaycan dilinə tərcümə olunub və onların əsasında dövlət qulluqçularına təlimlər keçirilib. Eyni zamanda, “Davamlı inkişaf naminə qabaqcıl İKT istiqamətləri” adlı regional təlim proqramının gələcəkdə yerli kontekstdə uyğunlaşdırılaraq Azərbaycan dilində müvafiq dövlət qurumlarında çalışan dövlət qulluqçuları üçün də təşkil olunması nəzərdə tutulur.
Qeyd edək ki, regional təlim proqramının kökləndiyi qabaqcıl İKT-nin əsas istiqamətləri (Frontier ICTs) Dövlət İmtahan Mərkəzi tərəfindən təşkil olunan ICDL sertifikat proqramlarından “ICDL Insights” adlı proqramı daxilində Süni intellekt (Artificial Intelligence), Əşyaların interneti (Internet of Things), Bulud hesablamalar (Cloud Computing) və Big Data adlı modulları kimi təqdim olunur. Ətraflı məlumat keçiddə verilib.
