Tədbirdə DİM-in Direktorlar Şurasının sədri Məleykə Abbaszadə, ACCA-in Türkiyə qolunun (Türkiyə, Azərbaycan və Gürcüstan) rəhbəri Filiz Demiröz, Market inkişafı üzrə meneceri Ülgen Coşkun Kıymık, “Ernst & Young Global Limited Azərbaycan”nın (EY) nümayəndələri və Azərbaycan Respublikasının ali təhsil müəssisələrinin bakalavriatura səviyyəsində təhsil alan tələbələr iştirak ediblər.
Görüş Azərbaycan Respublikasının Dövlət Himninin səsləndirilməsi ilə başlanıb. Daha sonra Vətənimizin müstəqilliyi və azadlığı uğrunda həlak olmuş şəhidlərimizin xatirəsi bir dəqiqəlik sükutla yad edilib.
Tədbiri giriş sözü ilə açan DİM-in Direktorlar Şurasının sədri Məleykə Abbaszadə maliyyə sahəsində fəaliyyət göstərən bir çox dövlət qurumları və özəl şirkətlərlə birgə layihələr təşkil etməyin önəmini vurğulayıb. Sədr çıxış zamanı insan kapitalının davamlı inkişafını təmin etməyin, maliyyə sektorunun bütün seqmentlərinin maliyyə sabitliyinin tənzimlənməsi və beynəlxalq standartlara uyğunlaşdırılmasının, həmçinin ACCA və EY Azərbaycanın başlayacağı layihə çərçivəsində keçiriləcək təlimlərin tələbələr üçün əlçatanlığının vacibliyini qeyd edib.
Tədbirdə ACCA-in Türkiyə qolunun (Türkiyə, Azərbaycan və Gürcüstan) rəhbəri Filiz Demiröz ACCA-in mühasibatlıq sahəsində karyeraları dəyişən tendensiyaları, fərdlərin karyeralarını inkişaf etdirə biləcəyi yeni yaranan yollar və zonaları araşdıran “Gələcəyə hazır ol: 2020-ci illərdə mühasib peşəsi” adlı tədqiqatının əsas nəticələrini bölüşüb.
Daha sonra “Ernst & Young Global Limited Azərbaycan” (EY) şirkətinin direktor müavini Samirə Şabanova Azərbaycanda karyera imkanları, audit, mühasibat uçotu və konsaltinq sektorunun trend mövzuları, mühasibat və maliyyə sektorunun karyeraya necə təkan verə biləcəyi və yeni qazanılmış peşəkar və texniki bacarıqların yüksək vəzifələrə apara biləcək yolu haqqında çıxış edib.
Bundan əlavə, şirkətin İnsan resursları departamentinin mütəxəssisi Fəridə İsrafilbəyova EY Azərbaycanın ACCA ilə birgə “Öyrən, bitir və işlə” layihəsinə start verəcəyini qeyd edib. Layihə haqqında məlumat verən mütəxəssis tədbirin sonunda tələbələrin suallarını cavablandırıb.
Layihə çərçivəsində tərəflərin birgə səyi ilə gənclərin məşğulluğunu təşviq etmək və tələbələrə imtahanlar və gələcək işəgötürənlərlə müsahibələrdən uğurla keçmək üçün onların ACCA Sertifikatlaşdırılmasına başlamağına kömək göstərilməsi nəzərdə tutulur.
ACCA və EY Azərbaycan proqramı birgə maliyyələşdirəcək və qeydiyyatdan keçmiş tələbələr üçün bəzi imtiyazlar təmin ediləcək, həmçinin qeydiyyat və proqram təşkilatçılığına kömək göstəriləcək. EY Azərbaycan layihənin 2 seçim mərhələsindən uğurla keçən 3 tələbənin ACCA kvalifikasiya imtahanlarında iştirakı üçün hazırlıq materiallarını təmin edəcək və qeydiyyat xərclərini qarşılayacaqdır.
Qeyd edək ki, DİM 2020-ci ilin avqust ayından etibarən ACCA-in rəsmi test mərkəzi kimi fəaliyyət göstərir. DİM-də ACCA imtahanları kompüter əsaslı formada keçirilir və namizədlər müvafiq qaydada qeydiyyatdan keçməklə imtahan verə bilərlər.
İmtahanda iştirak etmək üçün qeydiyyat linki: