Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyi tərəfindən həyata keçirilən "PeşəFest-2025"in Bakıda yekun tədbiri keçirilib. “Baku Crystal Hall”da “Peşə öyrən, gələcəyini qur!” devizi ilə keçirilən tədbirin məqsədi gənclərin və şagirdlərin peşə seçiminə dəstək olmaq, onların karyera istiqamətində doğru addım atmalarını təmin etmək olub.
Tədbirdə əmək və əhalinin sosial müdafiəsi naziri Anar Əliyev, Dövlət İmtahan Mərkəzinin İdarə Heyətinin sədri Məleykə Abbaszadə, Milli Məclisin Əmək və sosial siyasət komitəsinin sədri Musa Quliyev, gənclər və idman nazirinin müavini İndira Hacıyeva, İqtisadi İslahatların Təhlili və Kommunikasiya Mərkəzinin icraçı direktoru Vüsal Qasımlı, Dövlət Məşğulluq Agentliyinin İdarə Heyətinin sədri Sadiq Əliyev, təhsil müəssisələrindən rəhbər şəxslər, yeniyetmə və gənclər iştirak ediblər.
Anar Əliyev 2022-ci ildən təşkil olunan “Peşələr festivalı”nın gənclərin düzgün peşə seçiminə və əmək bazarına hazırlıqlı daxil olmalarına dəstək məqsədi daşıdığını diqqətə çatdırıb. Nazir 160 mindən çox gəncin bu tədbirlərə qatılaraq müxtəlif peşələr üzrə əmək bazarının tələbləri, zəruri bacarıqlar və karyera imkanları barədə praktiki məlumatlar əldə etdiyini bildirib.
Tədbirdə çıxış edən M.Abbaszadə “PeşəFest”in sadəcə sərgi və ya tanıtım deyil, dövlət, işəgötürənlər, təhsil müəssisələri və gənclik arasında dialoq məkanı olduğunu qeyd edib. M.Abbaszadə yeni dövrdə nüfuz, süni intellekt və IV sənaye inqilabı, gələcəyin bacarıqları haqqında məlumat verib. Sədr “PeşəFest”in öyrənmək, sual vermək, araşdırmaq və düzgün yol seçmək üçün yaradılan fürsət olduğunu qeyd edib və “Şablonlarla düşünməyin, sadəcə “dəbdədir” deyil, “faydalıdır, ehtiyac var, mən bacarıram” deyərək peşəni diplom üçün yox, mənalı həyat və sabit gələcək üçün seçin” – deyə gənclərə səslənib.
M.Abbaszadənin çıxışının mətni ilə buradan tanış ola bilərsiniz.
M.Abbaszadə həmçinin iştirakçıları oktyabrın 31-də Dövlət İmtahan Mərkəzinin elektron imtahanlar korpusunda keçiriləcək ənənəvi “Açıq görüş”ə dəvət edib.
Qeyd edək ki, həmin görüşdə peşə və ixtisas seçimi məsələləri müzakirə olunacaq və yeniyetmələr daha sonra Dövlət İmtahan Mərkəzinin mütəxəssisləri tərəfindən hazırlanan peşə seçimi testləri və dərslik materialları əsasında bilik səviyyəsinin yoxlanılması üzrə testlərdən ödənişsiz formada yararlanmaq imkanı əldə edəcəklər.
